გარემოს დაცვისა და სოფლის მეურნეობის სამინისტროში ევროკავშირთან ასოცირების შესახებ შეთანხმების ფარგლებში შექმნილი სანიტარიული და ფიტოსანიტარიული (SPS) ქვეკომიტეტის მე-8 შეხვედრა გაიმართა.

გარემოს დაცვისა და სოფლის მეურნეობის სამინისტროს ცნობით, შეხვედრის მონაწილეებმა შეთანხმების ფარგლებში ნაკისრი ვალდებულებების შესრულების მდგომარეობის საკითხები განიხილეს.

„მოხარული ვარ გიმასპინძლოთ საქართველოში, გარემოს დაცვისა და სოფლის მეურნეობის სამინისტროში. ჩვენთვის მნიშვნელოვანია ევროკავშირის დელეგაციის წარმომადგენლებს ვესაუბროთ იმ პროგრესზე, რასაც ასოცირების შეთანხმების ფარგლებში ქვეყანამ მიაღწია და, ასევე, ვისაუბროთ იმ გამოწვევებზე, რაშიც თქვენი მხარდაჭერის იმედი გვაქვს. ჩვენთვის მნიშვნელოვანია საქართველოს ევროკავშირში გაწევრიანების მზაობის კითხვარის დადებითი შეფასება. ვიმედოვნებ, ერთიანი ძალისხმევით და მჭიდრო თანამშრომლობით შევძლებთ კანდიდატის სტატუსის მოპოვებას, რაც ჩვენი მოქალაქეებისთვის, სხვა სიკეთეებთან ერთად, ევროკავშირის ბაზარზე წვდომის შესაძლებლობას კიდევ მეტად გაზრდის“, - განაცხადა გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა.

მინისტრის მოადგილემ მადლობა გადაუხადა ევროკავშირის დელეგაციის წარმომადგენლებს გაწეული დახმარებისთვის და ხაზი გაუსვა საქართველოსთვის მონიჭებული ევროპული პერსპექტივის სტატუსის მნიშვნელობას.

„საქართველოს აქვს ხედვა, ამბიცია და შესაბამისი გეგმა კანდიდატის სტატუსის მოსაპოვებლად. საქართველოს და ევროკომისიას წარმატებული თანამშრომლობა აკავშირებთ. მზად ვართ მჭიდრო პარტნიორული თანამშრომლობის გასაგრძელებლად“, - განაცხადა სანიტარიული და ფიტოსანიტარიული (SPS) ქვეკომიტეტის ხელმძღვანელმა, კოენ ვან დაიკმა.

როგორც უწყების მიერ გავრცელებულ ინფორმაციაშია ნათქვამი, შეხვედრაზე საუბარი შეეხო სურსათის უვნებლობის, ლაბორატორიის, ფიტოსანიტარიული და სანიტარიული მიმართულებებით საკანონმდებლო ბაზის სრულყოფის მნიშვნელობის საკითხებს. შეხვედრის ფარგლებში ნინო თანდილაშვილმა და სანიტარიული და ფიტოსანიტარიული (SPS) ქვეკომიტეტის ხელმძღვანელმა ხელი ასოცირების განახლებულ 11 ბ დანართს მოაწერეს.

„აღსანიშნავია, რომ განახლებული დანართი ევროკავშირის სამართლებრივი აქტების ჩამონათვალია, რომელსაც საქართველომ კანონმდებლობა უნდა დაუახლოოს.

შეხვედრას, ევროკავშირის დელეგაციის წევრები, საქართველოს ეკონომიკისა და მდგრადი განვითარების სამინისტროს, შემოსავლების სამსახურის, ასევე, სურსათის ეროვნული სააგენტოსა და სოფლის მეურნეობის სამინისტროს ლაბორატორიის ხელმძღვანელი პირები და სამინისტროს შესაბამისი სამსახურის წარმომადგენლები ესწრებოდნენ“, - ნათქვამია გავრცელებულ ინფორმაციაში.