ვგმობ იმას, რაც ახლა ჩვენს თავს ხდება, ვგმობ და წინააღმდეგობას ვუცხადებ „აგენტების კანონს“, - ამის შესახებ ეროვნული სიმფონიური ორკესტრის ხელმძღვანელი ნიკოლოზ რაჭველი სოციალურ ქსელში წერს, რითაც ე.წ. აგენტების შესახებ კანონპროექტებს ეხმაურება.

როგორც ნიკოლოზ რაჭველი განმარტავს, ე.წ. აგენტების შესახებ კანონპროექტების მიღება იწვევს იმ ქვეყნებისა და დიპლომატიური წრეების უაღრესად ნეგატიურ რეაქციას, რომელთა კეთილგანწყობა გადამწყვეტია ჩვენი ქვეყნის კონსტიტუციური კურსის - ევროპულ ოჯახში ინტეგრირების აღსასრულებლად.

„ახლა გავიგე კანონპროექტის განხილვას ხუთშაბათის ნაცვლად დღესვე შეუდგნენ. სამწუხაროდ, გასტროლზე ყოფნის გამო, ვერ ვიქნები პარლამენტთან საპროტესტო აქციაზე, მაგრამ მთელი არსით, შეგნებით, ჩემი სამშობლოს ენით აუწერელი სიყვარულით და ერთგული მსახურებით, მომავალ თაობებზე ფიქრითა და წარსულის გააზრებით ვგმობ იმას, რაც ახლა ჩვენს თავს ხდება, ვგმობ და წინააღმდეგობას ვუცხადებ „აგენტების კანონს” (ორივეს, სამივეს და გნებავთ ხუთი ვერსია რომ შემოგვთავაზონ ხუთივეს!).

უპირველეს ყოვლისა ის ბარიერია დემოკრატიული პროცესების გაძლიერების გზაზე ჩვენს სახელმწიფოში, ჩატეხილი ხიდია ჩვენსა და ჩვენდამი გულშემატკივარ დასავლელ პარტნიორებს, დონორებს, მხარდამჭერებს შორის. რაც მთავარია, იწვევს იმ ქვეყნებისა და დიპლომატიური წრეების უაღრესად ნეგატიურ რეაქციას, რომელთა კეთილგანწყობა გადამწყვეტია ჩვენი ქვეყნის კონსტიტუციური კურსის - ევროპულ ოჯახში ინტეგრირების აღსასრულებლად!,- წერს ნიკოლოზ რაჭველი.