პარლამენტში, საკანონმდებლო ორგანოს თავმჯდომარის, შალვა პაპუაშვილის ოთახთან ხმაური და სიტყვიერი დაპირისპირებაა.

კერძოდ, პარლამენტის ოპოზიციონერი დეპუტატები, ხათუნა სამნიძე, ანა ნაცვლიშვილი და სალომე სამადაშვილი პაპუაშვილთან შეხვედრას ითხოვენ.

მათი ინფორმაციით, პარლამენტთან აქციის მონაწილეებს არბევენ და უნდათ, რომ ამ საკითხზე პარლამენტის თავმჯდომარეს შეხვდნენ.

ოპოზიციონერ დეპუტატებს პაპუაშვილთან შესვლის შესაძლებლობას დაცვის თანამშრომლები არ აძლევენ, რასაც ფიზიკური შეხლა-შემოხლა მოჰყვა.

„მივმართავ რეგლამენტის დამცველს - რეგლამენტით დეპუტატებს უფლება აქვთ მოითხოვონ პარლამენტის თავმჯდომარესთან შეხვედრა და მან დაუყოვნებლივ უნდა შეასრულოს ეს. მაინტერესებს, სად არის შეყუჟული და რას აკეთებს, ნუ დაარღვევს რეგლამენტს, გამოვიდეს. ნუ ეშინია ჩვენი, არ შევჭამთ“,- განაცხადა ანა ნაცვლიშვილმა.