საქართველოს ქალ მოჭადრაკეთა ნაკრების წევრები: ნინო ბაციაშვილი, ბელა ხოტენაშვილი, ლელა ჯავახიშვილი, მერი არაბიძე და სალომე მელია პარლამენტის მიერ ე.წ. აგენტების შესახებ კანონპროექტის პირველი მოსმენით მიღების გამო შეშფოთებას გამოთქვამენ.

როგორც მათ მიერ გავრცელებულ ერთობლივ განცხადებაშია ნათქვამი, საქართველოს ადგილი ევროპაშია და გზა რუსეთისკენ ეწინააღმდეგება ქართველი ხალხის სულისკვეთებას.

„ჩვენ, საქართველოს ქალ მოჭადრაკეთა ნაკრების წევრები, უკიდურესად შეშფოთებულები ვართ საქართველოს პარლამენტის მიერ კანონის უცხოური აგენტების შესახებ ,პირველი მოსმენით მიღების გამო. ამ კანონის მიღებით ჩვენი ქვეყანა ჩავარდება ცუგცვანგის მდგომარეობაში, რაც ნიშნავს რომ ყველა შემდეგი ნაბიჯი და გადაწყვეტილება კიდევ უფრო დაამძიმებს ქვეყნის პოზიციას და დააშორებს ქვეყანას ჩვენს საერთო მიზანს, ევროკავშირში გაწევრიანებას. სხვა გზა არ არსებობს, სხვა გზა არის გზა რუსეთისკენ, რომელიც ეწინააღმდეგება ქართველი ხალხის სულისკვეთებას! საქართველოს ადგილი ევროპაშია!“, - ნათქვამია საქართველოს ქალ მოჭადრაკეთა ნაკრების წევრების ერთობლივ განცხადებაში.