მინდა გითხრა, ირაკლი ღარიბაშვილო, რომ ჩვენი მოქალაქეების წინააღმდეგ წყლის ჭავლები არასდროს არ გამოგვიყენებია, - ამის შესახებ ევროპარლამენტარი მარკეტა გრეგოროვა “ტვიტერის” პირად გვერდზე წერს.

ევროპარლამენტარი "ქართულ ოცნებას" მოუწოდებს, გააჩეროს "სიგიჟე" და "უცხოური აგენტების" კანონი.

“ქართული ოცნების” წარმომადგენლებისგან ბევრი ვერბალური თავდასხმა მიმიღია ჩემი პარტიის პოპულარობის შესახებ, რომ 40% არ გვაქვს. კარგი, მინდა გითხრა, ირაკლი ღარიბაშვილო, რომ ჩვენი მოქალაქეების წინააღმდეგ წყლის ჭავლები არასდროს არ გამოგვიყენებია. გააჩერეთ ეს სიგიჟე, გააჩერეთ “უცხოური აგენტების” კანონი. ტაშს ვუკრავ ამ მამაც ხალხს”, - წერს გრეგოროვა საქართველოს პარლამენტთან მიმდინარე აქციასთან დაკავშირებით.

შეგახსენებთ, რომ შინაგან საქმეთა სამინისტრომ პარლამენტთან შეკრებილი აქციის მონაწილეების დაშლა, რომლებიც საკანონმდებლო ორგანოს მიერ ე.წ. აგენტების შესახებ კანონპროექტების პირველი მოსმენით მიღებას აპროტესტებენ, 7 მარტს, საღამოს დაიწყო. მომიტინგეების დასაშლელად უწყებამ არაერთხელ წყლის ჭავლი, წიწაკის სპრეი და ცრემლსადენი გაზი გამოიყენა, თუმცა აღნიშნულის შემდეგ აქციის მონაწილეები კვლავ პარლამენტთან ბრუნდებოდნენ. რუსთაველის გამზირის მომიტინგეებისგან გათავისუფლების სამუშაოებს შსს უკვე რამდენიმე საათია ახორციელებს.