პარლამენტის შენობაზე გაკეთებულ საპროტესტო წარწერებს შლიან. კერძოდ, შესაბამისი სამსახურის წარმომადგენლები, პარლამენტის შენობის კედელზე აქციის მონაწილეების ის წარწერა წაშალეს, სადაც ნათქვამი იყო: „აქ სხედან ქვეყნის გამყიდველი მონები“.

ადგილზე ამ დროისთვის სიმშვიდეა.

ცნობისთვის, დღეს პარლამენტის შენობის წინ კვლავ განათავსეს რკინის ჯებირები, რომელიც გუშინ აქციის მონაწილეებმა წააქციეს. ამასთან, სამართალდამცავებმა, რკინის ჯებირები პარლამენტის უკანა მხარესაც დააბრუნეს. საკანონმდებლო ორგანოსთან საპატრულო პოლიციის წარმომადგენლები იმყოფებიან.

შეგახსენებთ, დღეს, 15:00 საათზე, საკანონმდებლო ორგანოსთან აქცია ისევ არის დაანონსებული.

მოქალაქეები, პოლიტიკოსები, მესამე სექტორის წარმომადგენლები ე.წ. აგენტების შესახებ კანონპროექტებს კიდევ ერთხელ გააპროტესტებენ. შინაგან საქმეთა სამინისტრომ პარლამენტთან შეკრებილი აქციის მონაწილეების დაშლა, რომლებიც საკანონმდებლო ორგანოს მიერ ე.წ. აგენტების შესახებ კანონპროექტების პირველი მოსმენით მიღებას აპროტესტებენ, 7 მარტს, საღამოს დაიწყო. მომიტინგეების დასაშლელად უწყებამ არაერთხელ წყლის ჭავლი, წიწაკის სპრეი და ცრემლსადენი გაზი გამოიყენა, თუმცა აღნიშნულის შემდეგ აქციის მონაწილეები კვლავ პარლამენტთან ბრუნდებოდნენ. რუსთაველის გამზირის მომიტინგეებისგან გათავისუფლების სამუშაოებს შსს რამდენიმე საათის განმავლობაში ახორციელებდა.