მე ეს განცხადება არ მომწონს. აქ, არც ბოდიშია. აქ ჩადებულია, რომ რაღაც კამპანიას ჩავატარებთო და ახლა ვინმეს ჰგონია, რომ ჩავა ოზურგეთში და იმ სიღარიბეში მცხოვრებ ხალხს დაარწმუნებენ, რომ კრასნოდარი და უფა სჯობს ევროპას? - ასე აფასებს პარტია „ხალხისთვის" თავმჯდომარე ანა დოლიძე ე.წ. აგენტების შესახებ კანონპროექტის უკან გაწვევის განცხადებას.

ანა დოლიძის თქმით, ბრძოლა ქართველმა ხალხმა მოიგო.

„ომი გრძელვადიანი პროცესია, ომი შედგება პატარ-პატარა ბრძოლებისგან, ეს ბრძოლა ქართველმა ხალხმა მოიგო! ჩვენ უნდა მივიღოთ და აღვნიშნოთ ეს გამარჯვება იმ ხალხმა, რომელიც გუშინ გაიყინა და რომელმაც სპეცდანიშნულების რაზმს თავი შეუშვირა, ორი-სამი დღეა რუსთაველზე დგას. ამ ხალხმა მიიღოს ეს გამარჯვება“,- განაცხადა ანა დოლიძემ და აღნიშნა, რომ ძალიან მნიშვნელოვანია, რაც შეიძლება დროულად გათავისუფლდნენ აქციაზე დაკავებული მოქალაქეები.

ანა დოლიძის თქმით, „ქართული ოცნება“ აღმოჩნდა იმავე კოლონიური აზროვნების მსხვერპლი, რა კოლონიურ აზროვნებასაც თესავს.

„ანუ თუ ისინი ატარებენ რუსულ ხაზს, მაშინ აზროვნებენ ისე, როგორც აზროვნებს კოლონიური ძალა. ოღონდ მნიშვნელოვანია ის, რომ ეს კოლონიური აზროვნება ამ ახალგაზრდებს არ აქვთ. კოლონიური აზროვნების ნიშანია, შენ, როგორც დამორჩილებული ერი უნდა წარმოგაჩინოს წარუმატებლად, უპასუხისმგებლოდ და ჩამორჩენილად. ეს არის რუსული პროექტი. ასევე, კოლონიური პროექტი არის ის, რომ შენ მეორეხარისხოვანი აზროვნება უნდა გაგიჩინოს, შენ უნდა თქვა, არაფერი გამომდის და ა.შ. მშრომელი და მიმწოლი ადამიანი აქ არ უნდა გაჩერდეს და გაიქცეს. აი, ეს შეეშალათ. მართლა ისტორია არ იციან. ყაველაშვილის ლოგიკას დაუკვირდით, ადამიანი ამბობს, რომ ან მოღალატე უნდა იყოო ან უწიგნურიო. ანუ თან განათლებული იყო და თან არ იყო მოღალატე და პატრიოტი იყო, ეს არ შეიძლება? ნახეთ, რა წამოსცდა. ანუ ეს ხალხი არის უწიგნური, ისინი ქართველებს არ იცნობებენ“, - განაცხადა ანა დოლიძემ.

მისი თქმით, ახლა სიფრთხილეა საჭირო.

„ჩვენ უნდა ვიყოთ ფხიზლად. მადლობა ღმერთს, საქართველოს ჰყავს დარაჯები, ის ხალხი, ვინც ქუჩაში იყო. ჩვენ ვართ საქართველოს პროგრესული მომავლის დარაჯები. მე ეს განცხადება (ე.წ. აგენტების კანონპროექტის უკან გაწვევის შესახებ განცხადება) არ მომწონს. აქ, არც ბოდიშია. აქ ჩადებულია, რომ რაღაც კამპანიას ჩავატარებთო და ახლა ვინმეს ჰგონია და პლანეტაზე ნორმალურია, რომ ჩავა ოზურგეთში და იმ სიღარიბეში, სოციალურ შემწეობაში მცხოვრებ ხალხს, რომელსაც შვილი, შვილიშვილი ევროპაში ჰყავს, იქიდან გამოგზავნილ ფულზე ცხოვრობს, რომელსაც ზეთს უგზავნიან ზამთარში რომ გადარჩეს, ამ ხალხს დაარწმუნებენ იმაში, რომ კრასნოდარი და უფა სჯობს ევროპას?“- განაცხადა ანა დოლიძემ.

შეგახსენებთ, რომ „ქართული ოცნების“ პოლიტიკური საბჭოს, „ხალხის ძალისა“ და საპარლამენტო უმრავლესობის ერთობლივი განცხადებით, მიიღეს გადაწყვეტილება, „უპირობოდ, ყოველგვარი დათქმის გარეშე გაიწვიონ კანონპროექტი“.

„ყოველივე ზემოაღნიშნულის გათვალისწინებით, როგორც საზოგადოების თითოეული წევრის წინაშე პასუხისმგებელმა მმართველმა ძალამ, მივიღეთ გადაწყვეტილება, უპირობოდ, ყოველგვარი დათქმის გარეშე გავიწვიოთ ჩვენს მიერ მხარდაჭერილი კანონპროექტი.

ემოციური ფონის ჩაცხრომასთან ერთად, საზოგადოებას უკეთ განვუმარტავთ, თუ რას ემსახურებოდა კანონპროექტი და რატომ იყო მნიშვნელოვანი უცხოური გავლენის გამჭვირვალობის უზრუნველყოფა ჩვენს ქვეყანაში. ამისათვის, დავიწყებთ შეხვედრებს მოსახლეობასთან და ფართო საზოგადოებას გავაგებინებთ სიმართლეს საკითხის თითოეულ დეტალთან დაკავშირებით“,- ნათქვამია განცხადებაში.