საქართველოს ტექნიკური უნივერსიტეტის ვაჟ ფრენბურთელთა გუნდი, საქართველოს ეროვნული ჩემპიონატის პირველ ეტაპზე გამარჯვების შემდეგ, მწვრთნელების - სულხან ახვლედიანის, სოსო ლობჟანიძისა და გიორგი ივანიშვილის ხელმძღვანელობით, მეორე ტურის თამაშებში მონაწილეობის მისაღებად თელავში გაემგზავრა. ამის შესახებ ინფორმაციას საქართველოს ტექნიკური უნივერსიტეტი ავრცელებს.

მათივე ინფორმაციით, ფრენბურთის საუნივერსიტეტო გუნდს საქართველოს ტექნიკური უნივერსიტეტის რექტორმა, პროფესორმა დავით გურგენიძემ და ადმინისტრაციის წარმომადგენლებმა გააცილეს.

როგორც სტუ-ის ვაჟ ფრენბურთელთა გუნდის მწვრთნელმა, სოსო ლობჟანიძემ განაცხადა, გუნდი ეროვნული ჩემპიონატისთვის კარგად არის მომზადებული, მითუმეტეს, რომ უნივერსიტეტის გუნდი ჩემპიონატის პირველ ტურის ლიდერია.

„საქართველოს ეროვნულ ჩემპიონატში სტუ-ის გუნდმა წარმატებით იასპარეზა, გავიდა პირველ ადგილზე, რამაც სპორტსმენების მოტივაცია კიდევ უფრო აამაღლა. გუნდი კარგადაა მომზადებული და გვაქვს იმედი, რომ მეორე ტურის თამაშებსაც წარმატებით დავასრულებთ“, - განაცხადა სოსო ლობჟანიძემ.

საქართველოს ტექნიკური უნივერსიტეტის რექტორმა, პროფესორმა დავით გურგენიძემ სტუდენტ ფრენბურთელთა გუნდს წარმატებები უსურვა და ყურადღება გაამახვილა იმ წარმატებებზე, რომელსაც სხვადასხვა დროს, გოგონათა და ვაჟთა საუნივერსიტეტო სპორტულმა გუნდებმა და მათ შორის ფრენბურთელებმაც მიაღწიეს.

„საქართველოს ტექნიკური უნივერსიტეტის სპორტული გუნდები ყოველთვის, საუნივერსიტეტო სპორტული ცხოვრების ყველა ეტაპზე გამორჩეული იყო სპორტული მომზადებითა და მაღალი მოტივაციით. ტრადიციას დღესაც არ ვღალატობთ. ჩვენი კალათბურთელები, მორაგბეები, სპორტსმენები ჭიდაობის სხვადასხვა სახეობაში, ფუტსალის მოთამაშეები და სხვა სპორტული გუნდები, არაერთხელ გახდნენ ჩემპიონები და პრესტიჟული ტურნირების გამარჯვებულები, როგორც ჩვენს ქვეყანაში, ისე მის ფარგლებს გარეთ. უნივერსიტეტის სტუდენტები და კურსდამთავრებულები წარმატებით ასპარეზობენ სხვადასხვა გუნდებსა და კლუბებში. ჩვენმა ფრენბურთის კლუბმაც არაერთხელ ასახელა საქართველო და ტექნიკური უნივერსიტეტი. წარმატებას ვუსურვებთ ეროვნულ ჩემპიონატში ჩვენს ახალგაზრდებს“, - განაცხადა რექტორმა, პროფესორმა დავით გურგენიძემ.

ფრენბურთში საქართველოს ეროვნული ჩემპიონატის მეორე ტური ქალაქ თელავში 10-12 მარტს გაიმართება.