ცენტრალური კრიმინალური პოლიციის დეპარტამენტის დირექტორის, თეიმურაზ კუპატაძის განცხადებით, გამოძიების ფარგლებში ნივთმტკიცების სახით ამოღებულია გამოუყენებელი „მოლოტოვის კოქტეილები“.

აღნიშნულის შესახებ მან შსს-ში გამართულ ბრიფინგზე განაცხადა, როდესაც ისაუბრა თბილისში მიმდინარე ე.წ. აგენტების შესახებ კანონის საპროტესტო აქციის გამოძიებაზე.

„ამ ეტაპზე მიმდინარეობს გამოძიება და გამოძიების ფარგლებში მოხდება იდენტიფიცირება იმ ადამიანების, ვინც აღნიშნულ ქმედებებს ახორციელებდა“, - განაცხადა კუპატაძემ.

ამასთან, კუპატაძე გამოეხმაურა დაკავებულთა ნაწილის განცხადებას იმასთან დაკავშირებით, რომ პოლიციამ მათ ბრალი ძალით აღიარებინა.

„რა ბრალზე საუბრობთ? ეს ადამიანები ადმინისტრაციული წესით არიან დაკავებულები. ისინი პოლიციის წარმომადგენლებმა დააკავეს, აქ ბრალზე არ არის საუბარი და მიიყვანეს დროებითი დაკავების იზოლატორში“, - განაცხადა თეიმურაზ კუპატაძემ.