GIZ-ის წარმომადგენელი - ITB ბერლინის გამოფენა ძალიან წარმატებული იყო, ბევრი ვიზიტორი დაინტერესდა საქართველოს ტურისტული პროდუქტებით
ITB ბერლინის გამოფენა ძალიან წარმატებული იყო, - ამის შესახებ IZ-ის წარმომადგენელმა თინათინ გვენეტაძემ განაცხადა.
გერმანიის საერთაშორისო თანამშრომლობის საზოგადოების GIZ ტურიზმის პროგრამების ექსპერტმა ITB-2023-ზე საქართველოს მონაწილეობა შეაფასა და აღნიშნა, რომ საქართველოთი ბევრი ვიზიტორი დაინტერესდა.
„გამოფენა ძალიან წარმატებული იყო. ბევრი ვიზიტორი დაინტერესდა საქართველოთი. ისინი გაეცნენ ჩვენი ბენეფიციარების პროდუქტებს, იმ საქმიანობას, რაც ევროკავშირისა და გერმანიის მთავრობის მიერ დაფინანსებული პროექტების ფარგლებში განხორციელდა. ჩვენ გვქონდა ღვინისა და საკვების პროდუქტების დეგუსტაცია. მოეწყო კერამიკისა და თექის მასტერკლასები. დამთვალიერებლებს ძალიან მოეწონათ და დიდი იმედი გაქვს ამ გამოფენის შემდეგ საქართველოში ტურისტების რაოდენობა გაიზრდება“, - აცხადებს თინათინ გვენეტაძე.
ტურიზმის ეროვნული ადმინისტრაციის ინფორმაციით, ITB ბერლინის საერთაშორისო ტურისტულ გამოფენაზე, სათავგადასავლო დარბაზში საქართველო დონორ ორგანიზაციებთან ერთად იყო წარმოდგენილი: ამერიკის შეერთებული შტატების საერთაშორისო განვითარების სააგენტო USAID, გერმანიის საერთაშორისო თანამშრომლობის საზოგადოება GIZ და ევროკავშირის წარმომადგენლობა, შვედეთის საელჩო და ავსტრიის განვითარების სააგენტო პროექტ GRETA-ს ფარგლებში.
