ზუგდიდის რაიონულ სასამართლოში ,,საქართველოს ბანკის“ დაყაჩაღებაში ბრალდებული ბადრი ესებუას საქმეზე სასამართლო პროცესი მიმდინარეობს.

დღევანდელ პროცესზე ბრალდების მხარის მტკიცებულებებს გამოიკვლევენ.

ამასთან, ბრალდების მხარეს მოწმეები ჰყავს წარმოდგენილი და სასამართლო მათ მოუსმენს. სხდომას ბრალდებულიც ესწრება.

ბადრი ესებუას ადვოკატის იოსებ ჯანაშიას თქმით, მათ კითხვები აქვთ ექსპერტიზის ჩატარებასთან დაკავშირებით, თუმცა სხდომაზე არანაირი შუამდგომლობის დაყენებას არ აპირებენ.

,,ბრალდების მხარე აგრძელებს თავისი მტკიცებულებების გამოკვლევას. გამოიკითხებიან ბრალდების მხარის მოწმეები. დღეისთვის 5 მოწმეა გამოცხადებული. ასევე, გამოვიკვლევთ წერილობით მტკიცებულებებს, საკმაოდ დიდი მოცულობით", - განაცხადა პროკურორმა მირანდა წერეთელმა.

ცნობისთვის, გამოძიების ინფორმაციით, ზუგდიდში, „საქართველოს ბანკის“ შენობაში 2020 წლის 21 ოქტომბერს შეიარაღებული ბადრი ესებუა შეიჭრა. მას მძევლად 40-ზე მეტი მოქალაქე ჰყავდა აყვანილი და მათი გათავისუფლების სანაცვლოდ 500 ათას აშშ დოლარს და უსაფრთხოების გარანტიებს ითხოვდა. თანხის გადაცემის შემდეგ თავდამსხმელმა გაქცევა მოახერხა. ბადრი ესებუა მიმდინარე წლის 8 თებერვალს დააკავეს. აღნიშნულ საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.