ლევან იოსელიანის კანდიდატურა ომბუდსმენის პოსტზე ხატია დეკანოიძემ შემოგვთავაზა - თავად რომ მოჰყვეს, ცუდი არ იქნება. ეს იყო მისი იდეა და „ქართულ ოცნებასაც“ მან მიაწოდა, - ამის შესახებ მოქალაქეების დეპუტატმა ალეკო ელისაშვილმა განაცხადა.

როგორც მან აღნიშნა, თავდაპირველად "ქართულ ოცნებას" ამ იდეაზე სამჯერ უთხრეს უარი.

„ლევან იოსელიანის კანდიდატურაზე არ გვიფიქრია, არც პირველი გასაუბრების და არც კანდიდატების ჩაგდების შემდეგ, რადგან ლევანი პარლამენტის ვიცე-სპიკერი, პარტიის ერთ-ერთი ლიდერი იყო და პარტიულ გეგმებზე ვსაუბრობდით ხოლმე. ხატია დეკანოიძე იყო ის, ვინც სულ თავიდან შემოგვთავაზა, გვითხრა, რომ ლევანის კანდიდატურა კარგი იქნებოდა და თუ მის კანდიდატურას დავაყენებდით, მას "ნაციონალური მოძრაობა" მხარს დაუჭერდა, ნაწილი მაინც. ამის შემდეგ ჩვენთან "ქართული ოცნებიდან" ერთი ჯგუფი მოვიდა და გვითხრეს, რომ ხატია დეკანოიძემ გვითხრა, კარგი იქნება იოსელიანის კანდიდატურა და მას მხარს დავუჭერთო. "ქართულ ოცნებას" დაახლოებით სამჯერ უარი ვუთხარით. შემდეგ დიდხანს ვისხედით და ვწონიდით, ეს გვიღირდა თუ არა.

რა შეიცვალა და დეკანოიძე ამას საჯაროდ რატომ უარყოფს, არ ვიცი. თავად რომ მოჰყვეს, ცუდი არ იქნება, ეს მისი აზრი, მისი იდეა იყო და "ქართულ ოცნებასაც" დეკანოიძემ მიაწოდა," - განაცხადა ელისაშვილმა.