ირაკლი ლექვინაძე - ჩვენი მიზანი სტუდენტების ხელშეწყობა და მომხმარებლის უფლებების დაცვის სექტორში კვალიფიციური კადრების მოზიდვაა

13-17 მარტს, კონკურენციის ეროვნული სააგენტოს, სემეკის, კომუნიკაციების კომისიის, ეროვნული ბანკის, დაზღვევის სახელმწიფო ზედამხედველობის სამსახურისა და სურსათის ეროვნული სააგენტოს ორგანიზებით, საქართველოში მომხმარებლის უფლებების დაცვის პირველი საერთაშორისო კვირეული იმართება. ამის შესახებ ინფორმაციას კონკურენციის ეროვნული სააგენტო ავრცელებს.

მათი ცნობით, ღონისძიებების ფარგლებში, მარეგულირებელი უწყებები, სექტორულად - მომხმარებლის უფლებების დაცვის მიმართულებით განხორციელებულ რეფორმებს, მიღებულ შედეგებს, არსებულ გამოწვევებს, აღსრულების მექანიზმებს, მომხმარებელთა ინფორმირების ეფექტურ კამპანიებს და საერთაშორისო გამოცდილებებს განიხილავენ.

„2022 წელს, საქართველოს პარლამენტმა „მომხმარებლის უფლებების დაცვის შესახებ“ საქართველოს კანონი მიიღო, ხოლო კონკურენციის სააგენტომ აღსრულების პროცესი 1 ნოემბრიდან დაიწყო. შესაბამისად, კონკურენციის სააგენტო 2023 წელს პირველად უერთდება აღნიშნული მიმართულებით გამართულ ღონისძიებებს. მნიშვნელოვანია, რომ თითოეულმა მოქალაქემ იცოდეს რა არის მისი უფლება, როგორ დაიცვას და, საჭიროების შემთხვევაში, ვის მიმართოს. ჩვენი მთავარი მოვალეობაა - საქართველოს თითოეული მოქალაქის უფლებების დაცვის მაღალი ხარისხის უზრუნველყოფა, მომხმარებლის უფლებების სამართლებრივი საფუძვლების განსაზღვრა და პატივისცემაზე დამყარებული ქცევის კულტურის ხელშეწყობა, რომელიც საქართველოსა და ევროკავშირს შორის გაფორმებული ასოცირების შეთანხმების ვალდებულების ნაწილია.

კვირეულის დაგეგმვის პროცესში ჩვენ მივიღეთ გადაწყვეტილება და სხვადასხვა უნივერსიტეტებში, პროექტის “დაიწყე კარიერა კონკურენციის სააგენტოში“ ფარგლებში, სტუდენტებთან სამუშაო შეხვედრები გავმართეთ, რაც ვფიქრობ, რომ იყო ძალიან შედეგიანი და საინტერესო ორივე მხარისთვის. ჩვენ ერთობლივ ფორმატში ვიმსჯელეთ - მიმდინარე და დასრულებული საქმეების შესახებ, მომხმარებლის უფლებების დაცვის მექანიზმებზე და მიღებული კანონის სიკეთეებზე. ჩვენი მიზანია სტუდენტების პრაქტიკული უნარ-ჩვევების განვითარება, ხელშეწყობა და მომხმარებლის უფლებების დაცვის სექტორში კვალიფიციური კადრების მოზიდვა. პროექტის ფარგლებში, ივანე ჯავახიშვილის სახელობის თბილისის სახელმწიფო უნივერსიტეტის სამი სტუდენტი - ნუცა ფუტკარაძე, მარიამ ჯანგველაძე და ანი სამსიანი გახდნენ, რომლებიც სამომავლო დასაქმების პერსპექტივით, სააგენტოში სტაჟირებას გაივლიან“, - განაცხადა კონკურენციის ეროვნული სააგენტოს თავმჯდომარე ირაკლი ლექვინაძემ და მოწვეულ სტუმრებს, სტუდენტებსა და აკადემიური სექტორის წარმომადგენლებს მონაწილეობისათვის მადლობა გადაუხადა.

„კვირეულის ფარგლებში, სტუდენტებთან პირველი შეხვედრა თბილისის საკრებულოს დარბაზში შედგა, სადაც სიტყვით გამოვიდნენ: თბილისის მუნიციპალიტეტის საკრებულოს თავმჯდომარე, გიორგი ტყემალაძე; სემეკის წევრი, მაია მელიქიძე; კომუნიკაციების კომისიის წევრი, ვახტანგ აბაშიძე; ეროვნული ბანკის ვიცე-პრეზიდენტი, პაპუნა ლეჟავა; დაზღვევის სახელმწიფო ზედამხედველობის სამსახურის უფროსის მოადგილე, ეკატერინე წერეთელი; სურსათის ეროვნული სააგენტოს სურსათის უვნებლობის დეპარტამენტის უფროსი, ვასილ კვერნაძე და საქართველოში მოქმედი უნივერსიტეტების ხელმძღვანელი პირები.

მომხმარებელთა უფლებების დაცვის საერთაშორისო კვირეულთან დაკავშირებით შემდეგი ღონისძიებები გაიმართება:

- 15 მარტი, 12 საათი, სასტუმრო „ბილტმორი“, სხვადასხვა დაინტერესებული მხარეების ჩართულობით, კვირეულის გახსნის ღონისძიება.

- 17 მარტი, 11:00 საათი, ქ. ბათუმი, სასტუმრო „ჰილტონი“ კვირეულის დახურვის ღონისძიება - შეხვედრა მომხმარებლებთან და ადგილობრივი ბიზნეს სექტორის წარმომადგენლებთან.

ღონისძიებების მიზანია, ცნობიერების ამაღლება და საქართველოში მომხმარებლის უფლებების დაცვის ხარისხის გაძლიერება”, - ნათქვამია ინფორმაციაში.

გიორგი ანთაძე - თუ ასე გაგრძელდა, დასავლეთთან ურთიერთობების აღდგენას და სათანადო რელსებზე დაბრუნებას დიდი დრო შეიძლება დასჭირდეს, ან კიდევ სულაც წარმოუდგენლად გართულდეს
ქართული პრესის მიმოხილვა 15.07.2024
რობინ ვაგენერი - „უცხოური გავლენის გამჭვირვალობის შესახებ“ კანონთან ერთად ევროკავშირში გაწევრიანება აღარ იქნება - ამის შანსი არ არის
უპრეცედენტო პირობები Renault Captur-ის ახალი ავტომობილის შეძენისას
თიბისი სტარტაპერებისთვის ახალ კამპანიას იწყებს
ბაზისბანკი სვანეთის IV საერთაშორისო კინოფესტივალის ოფიციალური სპონსორია