შვედეთის პრემიერ-მინისტრის, ულფ კრისტერსონის განცხადებით, იმის ალბათობა, რომ ფინეთი ნატო-ს წევრი მანამდე გახდება, სანამ ალიანსში შვედეთი გაწევრიანდება, გაიზარდა.

„რაც ჩვენ დავინახეთ ბოლო კვირებში არის ის, რომ ამის ალბათობა სხვადასხვა დროს გაიზარდა“, - აღნიშნა ულფ კრისტერსონმა.

ამასთან, მისივე თქმით, შვედეთის ალიანსში გაწევრიანება მხოლოდ დროის საკითხია.

„საბოლოოდ, საქმე ის კი არ არის, გახდება თუ არა შვედეთი ნატო-ს წევრი, არამედ ის, თუ როდის გახდება“, - აღნიშნა შვედეთის პრემიერმა.

შეგახსენებთ, თურქეთმა, ფინეთმა და შვედეთმა ნატო-ში გაწევრიანებების პროცესზე მოლაპარაკებები ბრიუსელში გასულ კვირას განაახლეს. შვედეთმა და ფინეთმა ნატო-ში გაწევრიანებაზე განაცხადი გასულ წელს გააკეთეს, მაგრამ თურქეთის მხრიდან წინააღმდეგობას წააწყდნენ. ანკარა ამტკიცებს, რომ აღნიშნული ორი ქვეყანა „ტერორისტული დაჯგუფებების წევრების თავშესაფარია“. ამასთან, თურქეთის ხელისუფლებაში გარკვევით აცხადებენ, რომ ფინეთზე მეტად შვედეთის გაწევრიანების წინააღმდეგები არიან. თურქეთსა და შვედეთს შორის ურთიერთობა მიმდინარე წლის იანვარში მას შემდეგ კიდევ უფრო დაიძაბა, რაც ულტრამემარჯვენე პარტიის მიერ ორგანიზებული აქციების დროს სტოკჰოლმში, თურქეთის საელჩოსთან ყურანი დაწვეს.