ეს არის არჩევანი, ერთ მხარეს ახალგაზრდები, რომლებიც თავისუფლებას წარმოადგენენ, ხოლო მეორე მხარეს ივანიშვილი და კობახიძე, - ასე ეხმაურება „ევროპული საქართველოს“ თავმჯდომარე, გიგა ბოკერია „ქართული ოცნების“ თავმჯდომარის, ირაკლი კობახიძის მიერ გაკეთებულ განცხადებას.

მისივე თქმით, კობახიძე არის იმის სიმბოლო, რასაც უნდა დავემშვიდობოთ.

„ის ახალგაზრდები, ვისზეც ეს პოლიტიკური არარაობა ასეთი სიძულვილით საუბრობდა, ცილს სწამებდა, იქნება ეს ფრანკლინის კლუბი, თავისუფალი უნივერსიტეტის, თუ სხვა უნივერსიტეტის ახალგაზრდები, ყველა ამ ქვეყნის მომავალია ყოველგვარი პათეტიზმისა და გადაჭარბების გარეშე. უამრავი განსხვავებული აზრის მქონე ახალგაზრდაა, თუმცა ფუნდამენტურად თავისუფალ ქვეყანაში ცხოვრების მოსურნე, ხოლო კობახიძე არის იმის სიმბოლო, რასაც უნდა დავემშვიდობოთ, რაც არის საფრთხე, ასევე არის ის ჯოჯოხეთი, რომელიც 1921 წლიდან ჩვენს ქვეყანას მოუვიდა და რასაც ეს რეჟიმი განასახიერებს.

ეს არის არჩევანი, ეს ახალგაზრდები, ვისაც თავს ესხმის თავად კობახიძე და ივანიშვილი. ჩვენ გვქონდა პოსტერები ამათი სახეებით, რომ „ბოროტება სიკეთეა“ - ეს არის კობახიძე და „თავისუფლება“ - არიან ის ახალგაზრდები, ვინც ახლა მათი სამიზნეა“, - განაცხადა გიგა ბოკერიამ, რომლის კომენტარსაც „ევროპული საქართველო“ ავრცელებს.

ცნობისათვის, "ქართული ოცნების“ თავმჯდომარის ირაკლი კობახიძის განცხადებით, „ფრანკლინის კლუბი“ არის უცხოური გავლენის აგენტი, რომელიც ახდენს მოსწავლეთა და სტუდენტთა პოლიტიკური აქტივიზმისთვის რეკრუტირებას და მისი მხარდამჭერია ამერიკული ორგანიზაცია „ატლას ნეთვორქი“, რომელიც წარსულში არაძალადობრივ და ძალადობრივ პროტესტს აორგანიზებდა მსოფლიოს არაერთ ქვეყანაში.