უკრაინა ესპანეთისგან დაპირებული ექვსი ერთეული „ლეოპარდ 2“ ტანკის გარდა, კიდევ 4 ტანკს მიიღებს, - ამის შესახებ ესპანეთის თავდაცვის მინისტრმა მარგარიტა რობლესმა უკრაინის თავდაცვის საკონტაქტო ჯგუფის შეხვედრის შემდეგ განაცხადა.

მისი თქმით, პირველი ექვსი ტანკი უკრაინას უახლოეს მომავალში გადაეცემა.

ამასთან, ესპანეთის თავდაცვის სამინისტროს ხელმძღვანელმა გამოაცხადა, რომ დაგეგმილია უკრაინისთვის TOA M113 ჯავშანტექნიკის ახალი პარტიის მიწოდება, რომელიც სპეციალიზირებულია საბრძოლო ნაწილების ტრანსპორტირებაში.

გუშინ, უკრაინის თავდაცვის საკონტაქტო ჯგუფის (ე.წ. “რამშტაინ-10”) სხდომის გახსნისას აშშ-ის თავდაცვის მინისტრმა, ლოიდ ოსტინმა განაცხადა, რომ იზრდება იმ ქვეყნების რაოდენობა, რომლებიც უკრაინის საჰაერო თავდაცვის სისტემის გაძლიერებაზე ვალდებულებას იღებენ. ასევე, მისი თქმით, ცხრა ქვეყანა გეგმავს, უკრაინას "ლეოპარდის" 150-ზე მეტი ტანკი გადასცეს.