კანადა უკრაინას სამხედრო დახმარების ახალ პაკეტს მიაწვდის, - ამის შესახებ ქვეყნის თავდაცვის მინისტრმა, ანიტა ანანდმა „რამშტაინის“ ფორმატში გამართული შეხვედრის შედეგებზე საუბრისას განაცხადა.

კერძოდ, მისი თქმით, კანადა უკრაინას გადასცემს 155 მმ კალიბრის დაახლოებით 8000 საბრძოლო მასალას, ასევე საჰაერო თავდაცვის სისტემების მხარდასაჭერად 12 საზენიტო რაკეტას კანადის შეიარაღებული ძალების მარაგიდან.

გარდა ამისა, კანადის თავდაცვის სამინისტროს ხელმძღვანელის ინფორმაციით, კანადამ Leopard 2 ტიპის ძირითადი საბრძოლო ტანკების დამატებითი რაოდენობის მიწოდება დაიწყო. საერთო ჯამში, კანადა უკრაინას რვა ერთეულ Leopard 2 ტიპის საბრძოლო ტანკს დაჰპირდა.

გუშინ, უკრაინის თავდაცვის საკონტაქტო ჯგუფის (ე.წ. “რამშტაინ-10”) მეათე შეხვედრა გაიმართა. აშშ-ის თავდაცვის მინისტრმა, ლოიდ ოსტინმა განაცხადა, რომ იზრდება იმ ქვეყნების რაოდენობა, რომლებიც უკრაინის საჰაერო თავდაცვის სისტემის გაძლიერებაზე ვალდებულებას იღებენ. ასევე, მისი თქმით, ცხრა ქვეყანა გეგმავს, უკრაინას "ლეოპარდის" 150-ზე მეტი ტანკი გადასცეს.