კიშინიოვში პარტია „შორის“ მხარდამჭერები საპროტესტო აქციას მართავენ

მოლდოვის დედაქალაქ კიშინიოვში, პარლამენტის შენობის წინ ოპოზიციური პარტია „შორის“ მხარდამჭერები და წევრები საპროტესტო აქციას მართავენ.

შეკრებილები ხელისუფლებისგან მოითხოვენ კანონპროექტის მიღებას, რათა ზამთრის თვეებში მოსახლეობის მიერ დახარჯული ელექტროენერგიისა და ბუნებრივი აირის გადასახადი მთავრობამ სრულად დაფაროს.

პარტიის დეპუტატები მსგავსი საკანონმდებლო ინიციატივის პარლამენტში რეგისტრაციას დღეს გეგმავენ.

საპროტესტო აქციის დროს შეხლა-შემოხლა მოხდა. რამდენიმე მამაკაცი „შორის“ წევრებს თავს დაესხა.

სამართალდამცავებმა ერთი მათგანი დააკავეს, თუმცა მოგვიანებით გაათავისუფლეს.

მიმდინარე საპროტესტო აქციის გამო რამდენიმე ქუჩაზე ტრანსპორტის მოძრაობა შეზღუდულია.