კავკასიის საერთაშორისო უნივერსიტეტში მოსამართლე ლევან დარბაიძის საჯარო ლექცია გაიმართა თემაზე: „აღდგენითი მართლმსაჯულება მოსამართლის პერსპექტივიდან“
16 მარტს, კავკასიის საერთაშორისო უნივერსიტეტში, გორის რაიონული სასამართლოს მოსამართლის, სამართლის დოქტორის, ლევან დარბაიძის საჯარო ლექცია გაიმართა თემაზე: „აღდგენითი მართლმსაჯულება მოსამართლის პერსპექტივიდან“. ამის შესახებ ინფორმაციას კავკასიის საერთაშორისო უნივერსიტეტი ავრცელებს.
მათივე ცნობით, სპიკერმა სტუდენტებთან შეხვედრაზე აღდგენითი მართლმსაჯულების ძირითად პრინციპებზე ისაუბრა. აღინიშნა, რომ ეს არის პროცესი, რომლის ფარგლებშიც განისაზღვრება კონკრეტულ დანაშაულთან დაკავშირებული ზიანი, პასუხისმგებლობები და ვალდებულებები, ასევე მხარეთა ჩართულობით ზიანის გამოსწორებისა და ურთიერთობების აღდგენის პროცესი.
„შეხვედრას ესწრებოდნენ კავკასიის საერთაშორისო უნივერსიტეტის სამართლის ფაკულტეტის დეკანი, პროფესორი გიორგი ხატიძე, დეკანის მოადგილე, თამთა წირქვაძე, სამართლის ასოცირებული პროფესორი სერგო ჭელიძე და სამართლის ფაკულტეტის საბაკალავრო და სამაგისტრო პროგრამების სტუდენტები.
შეხვედრა კითხვა-პასუხის რეჟიმით წარიმართა, სადაც სტუდენტებმა ამომწურავი პასუხები მიიღეს მათთვის საინტერესო საკითხებთან დაკავშირებით“, - აღნიშნულია ინფორმაციაში.
