ხათუნა სამნიძე, თამარ კორძაია და თეონა აქუბარდია -  არასამთავრობო ორგანიზაციების დადანაშაულება პარლამენტის წევრებზე ზეწოლაში სხვა არაფერია, თუ არა მორიგი მცდელობა, გააღრმაონ დაპირისპირება

საქართველოს პარლამენტის წევრები ხათუნა სამნიძე, თამარ კორძაია და თეონა აქუბარდია სახალხო დამცველის არჩევასთან დაკავშირებით, პარლამენტის თავმჯდომარის შალვა პაპუაშვილის და „ქართული ოცნების“ თავმჯდომარის ირაკლი კობახიძის განცხადებებს ეხმაურებიან.

როგორც განცხადებაშია ნათქვამი, ეჭვის გამოთქმა და არასამთავრობო ორგანიზაციების დადანაშაულება პარლამენტის წევრებზე ზეწოლაში, სხვა არაფერია, თუ არა მორიგი მცდელობა, გააღრმაონ დაპირისპირება საზოგადოების სხვადასხვა წარმომადგენლებს შორის.

„გვინდა, გამოვეხმაუროთ პარლამენტის თავმჯდომარის შალვა პაპუაშვილის და ასევე „ქართული ოცნების“ თავმჯდომარის ირაკლი კობახიძის მიერ არაერთგზის, მიზანმიმართულად გაკეთებულ დეზინფორმაციის შემცველ განცხადებებს სახალხო დამცველის არჩევასთან დაკავშირებით.

ეჭვის გამოთქმა და არასამთავრობო ორგანიზაციების დადანაშაულება პარლამენტის წევრებზე - ჩვენზე ზეწოლაში სხვა არაფერია, თუ არა მორიგი მცდელობა, გააღრმაონ დაპირისპირება საზოგადოების სხვადასხვა წარმომადგენლებს შორის.

შეკითხვების დასმა და განსხვავებული მოსაზრების გამოხატვა ნებისმიერ საკითხთან დაკავშირებით არის გამოხატვის თავისუფლება და დემოკრატიული პროცესი, რასაც ჩვენ როგორც განცხადებებით, ასევე გადაწყვეტილებით პასუხი გავეცით. ხოლო ბულინგი და ზეწოლა არის ის, რასაც საკუთარი განცხადებებით და ქმედებებით აკეთებს „ქართული ოცნება“, როდესაც თავს ესხმის უნივერსიტეტებს და ახალგაზრდებს, რომლებმაც თავისუფალი აზრი გამოხატეს და შეიკრიბნენ პარლამენტის წინ.

ასევე სახიფათო და სიძულვილის გაღვივებაა, მთელს ქალაქში ჩვენი ფოტოებით პლაკატების გაკვრა, რაც პირდაპირ მწვანე შუქს უნთებს მოძალადე ჯგუფებს, რომლებმაც რამდენიმე დღის წინ პარლამენტის წინ პოლიციის მხრიდან აღკვეთის გარეშე ევროკავშირის დროშა დაწვეს. სწორედ ეს არის ბულინგი და ზიზღის ენა, ხოლო ზეწოლაა, როდესაც საკუთარი პარტიის წევრებს უკრძალავ თავისუფალი აზრის გამოხატვას“,- ნათქვამია გავრცელებულ განცხადებაში.

ირაკლი მელაშვილი - კანონის მიღებით ხელისუფლებამ საბედისწერო შეცდომა დაუშვა
ქართული პრესის მიმოხილვა 20.05.2024
ოლეგ ჟდანოვი -  პუტინმა  შეცვალა  უკრაინაში  ომის  პარადიგმა, მას კარგად ესმის, რომ რუსული არმია ნებისმიერ დროს შეიძლება ჩამოიშალოს
კახა ოქრიაშვილი - ვერცერთი ქართული ოჯახი ვერ იქნება ბედნიერი, თუ ჩვენი დიდი ოჯახი, საქართველო ძლიერი და ბედნიერი არ იქნება