უკრაინის პრეზიდენტი, ვოლოდიმირ ზელენსკი კიევში ლატვიის პრემიერ-მინისტრს, კრიშიანის კარინშს შეხვდა და რუსეთის აგრესიისგან თავის დასაცავად მხარდაჭერისთვის მადლობა გადაუხადა.

„ლატვიის პრემიერ-მინისტრს კიევში შევხვდი. მადლობა გადავუხადე ჩვენი სახელმწიფოსთვის თავდაცვის ახალი პაკეტის გამოყოფისთვის, ყველა დონეზე პრინციპული მხარდაჭერისთვის - იარაღიდან დაწყებული პოლიტიკით დამთავრებული, რუსეთის წინააღმდეგ სანქციებიდან დაწყებული იურიდიულ საკითხებამდე", - განაცხადა უკრაინის პრეზიდენტმა.

ზელენსკის თქმით, ლატვიის პრემიერ-მინისტრთან ევროკავშირისა და ნატო-სკენ მიმავალ გზაზე უკრაინის პერსპექტივები განიხილა.

"უკრაინა ყოველთვის ევროპა იყო. უკრაინა ყოველთვის იქნება ევროპა. რუსული ბომბები ვერ შეცვლის ობიექტურ რეალობას. რეალობას, რომელსაც უკრაინელები იცავენ. მადლობას ვუხდი ყველას, ვინც ახლა იბრძვის მარინკას მახლობლად, ბახმუტთან, ავდიივკასთან, ლუგანსკის ოლქში, სამხრეთის ფრონტის ხაზზე. მადლობა ყველას, ვინც რუსეთს ასწავლის, რომ ბოროტებაზე პასუხისმგებლობა გარდაუვალია“, - განაცხადა პრეზიდენტმა.