კრემლის პრესსპიკერი, დიმიტრი პესკოვი უკრაინისთვის საბრძოლო თვითმფრინავების გადაცემასთან დაკავშირებით პოლონეთისა და სლოვაკეთის გადაწყვეტილებას ეხმაურება და ამ ნაბიჯს მოძველებული, არასაჭირო აღჭურვილობის უტილიზაციას აფასებს.

„იქმნება განცდა, რომ ეს ქვეყნები ძველი, არასაჭირო აღჭურვილობის უტილიზაციით არიან დაკავებულები“, - განაცხადა კრემლის პრესსპიკერმა.

მისი თქმით, პოლონეთისა და სლოვაკეთის მიერ უკრაინისთვის საბრძოლო თვითმფრინავების მიწოდება კონფლიქტის მიმდინარეობაზე გავლენას ვერ მოახდენს. „არ არის საჭირო, სამხედრო ექსპერტი იყო იმისთვის, რომ თქვათ, რომ ეს გავლენას არ მოახდენს", - აღნიშნა პესკოვმა.

ამასთან, მისი თქმით, ეს ნაბიჯი არის კიდევ ერთი მაგალითი იმისა, თუ როგორ ზრდიან ნატო-ს წევრები კონფლიქტში უშუალო ჩართულობის დონეს.

შეგახსენებთ, სლოვაკეთის პრემიერ-მინისტრმა, ედუარდ ჰეგერმა დღეს განაცხადა, რომ მისი ქვეყანა უკრაინას „მიგ 29“ ტიპის 13 გამანადგურებელს გადასცემს. გუშინ კი პოლონეთი პრეზიდენტმა, ანჯეი დუდამ განაცხადა, რომ უკრაინას, უახლოეს დღეებში, „მიგ-29“ ტიპის 4 გამანადგურებელს გაუგზავნიან.