პუტინმა ენერგეტიკული ბრძოლა წააგო, შანტაჟმა არ იმუშავა, - ამის შესახებ ევროკომისიის პრეზიდენტმა ურსულა ფონ დერ ლაიენმა ნორვეგიის დასავლეთ სანაპიროსთან მდებარე გაზის Troll A პლატფორმაზე ვიზიტის დროს განაცხადა.

ევროკომისიის პრეზიდენტს თან ახლდნენ ნატო-ს გენერალური მდივანი იენს სტოლტენბერგი და ნორვეგიის პრემიერ-მინისტრი იონას გარ სტიორე.

“პუტინმა აშკარად წააგო ბრძოლა, რომელიც მან დაიწყო. მისმა შანტაჟმა არ იმუშავა”, - განაცხადა ფონ დერ ლაიენმა.

მან აღნიშნა, რომ ევროკავშირი ახლა გაცილებით მეტ ენერგორესურსებს მიიღებს ისეთი მოკავშირეებისგან, როგორებიც არიან აშშ და ნორვეგია. ევროკომისიის პრეზიდენტმა ასევე აღნიშნა, რომ ევროპამ მნიშვნელოვანი ინვესტიციები გააკეთა ენერგიის განახლებად წყაროებში და ენერგიის მოხმარება 20%-ით შეამცირა.

“ასე რომ, თუ პრეზიდენტი პუტინი ჩვენს დაჩოქებას გეგმავდა, მან სრულიად საპირისპიროს მიაღწია. ახლა უფრო ძლიერები და დამოუკიდებლები ვართ, ვიდრე ოდესმე”, - განაცხადა ფონ დერ ლაიენმა.