თბილისის საკრებულოში გენდერის საკითხების ექსპერტთან, შერილ ტომასთან შეხვედრა გაიმართა
თბილისის საკრებულოს გენდერული თანასწორობის საბჭოს ჩართულობითა და „მერსი ქორფს საქართველოს“ WISE პროგრამის ორგანიზებით, ამერიკელ ექსპერტ შერილ ტომასთან და თბილისში მოქმედი სხვადასხვა მედიასაშუალების წარმომადგენლებთან საინფორმაციო შეხვედრა გაიმართა.
თბილისის საკრებულოს მიერ გავრცელებული ინფორმაციით, ღონისძიება საკრებულოს თავმჯდომარის მოადგილემ, გენდერული თანასწორობის საბჭოს ხელმძღვანელმა, თინათინ ნიბლოშვილმა გახსნა და მოწვეულ სტუმრებს გენდერული საბჭოს მიერ განხორციელებული პროექტების, მიზნებისა და სამომავლო გეგმების შესახებ ესაუბრა.
„შეხვედრაზე ამერიკელმა გენდერის საკითხების ექსპერტმა, შერილ ტომასმა იმ ძირითად პრობლემებსა და გამოწვევებზე ისაუბრა, რომლებიც საქართველოში ქალთა მიმართ ძალადობის თემაზე არსებობს. ასევე ყურადღება გაამახვილა გენდერული ნიშნით ძალადობის წინააღმდეგ ბრძოლის პროცესში საზოგადოების ჩართულობაზე. ექსპერტმა მედიის წარმომადგენლებს ის პრაქტიკა და სამართლებრივ რეფორმები გააცნო, რომლებიც სხვადასხვა ქვეყანაში ქალთა და გოგონათა მიმართ ძალადობის აღსაკვეთად ეფექტიან მექანიზმად იქცა.
დღესვე WISE - ქალთა ინიციატივა უსაფრთხოებისა და თანასწორობისთვის - პროგრამის დირექტორმა, ნინო ჭელიძემ აუდიტორიას წარუდგინა პროგრამა, რომელიც აშშ-ის სახელმწიფო დეპარტამენტის მხარდაჭერით ხორციელდება და მიზნად ისახავს ქალთა მიმართ ძალადობასთან დაკავშირებული ცნობიერების ამაღლებას და მასზე შესაბამის რეაგირებას. ჟურნალისტიკის რესურსცენტრის დირექტორმა, ნათია კუპრაშვილმა კი ქალთა მიმართ ძალადობასთან ბრძოლის საკითხებში მედიის როლზე ყურადღება გაამახვილა და ამ თემის ინკლუზიური გაშუქების მნიშვნელობაზე ისაუბრა.
შეხვედრაზე, ასევე, გენდერული ნიშნით ძალადობისა და ძალადობრივი ექსტრემიზმის საკითხებზე სამხრეთ კავკასიაში ISET-ის მიერ მომზადებული კვლევის შუალედური შედეგების პრეზენტაცია გაიმართა“, - აღნიშნულია გავრცელებულ ინფორმაციაში.
v-if="article.gallery" v-html="article.gallery"
