2023 წლის მასწავლებლის ეროვნული ჯილდოს გახსნითი ღონისძიება ილია ჭავჭავაძის ლიტერატურულ-მემორიალურ მუზეუმში გაიმართა. ამასთან ერთად, გაიხსნა ნომინირების და აპლიკაციის წარდგენის პერიოდიც.

„ილიაუნის“ ინფორმაციით, განათლების კოალიციის ინიციატივითა და ორგანიზებით, კონკურსი წელს მეშვიდედ ტარდება და მიზნად ისახავს წარმატებული მასწავლებლების გამოვლენას, საზოგადოებისთვის გაცნობას და ამ გზით პროფესიის პრესტიჟის ზრდას.

მათივე ცნობით, ღონისძიებაზე ორგანიზატორებმა კონკურსის პირობების, კამპანიის ეტაპების, ჟიურის, მხარდამჭერებისა და ფინალური ღონისძიების შესახებ ისაუბრეს. ასევე, შეხვედრაზე განათლების კოალიციასა და ალტე უნივერსიტეტს შორის თანამშრომლობის მემორანდუმი გაფორმდება. მემორანდუმის ფარგლებში ალტე უნივერსიტეტი ხდება მასწავლებლის ეროვნული ჯილდოს პარტნიორი და რჩეულ მასწავლებელს 2023 წლის ფინალის დროს დააჯილდოებს, გარდა ამისა, ალტე უნივერსიტეტი იქნება მასწავლებლის ეროვნული ჯილდოს ათეულის კლუბის ექსკლუზიური პარტნიორი.

„წელს, უკვე მეშვიდედ, ვიწყებთ მასწავლებლის ეროვნული ჯილდოს კამპანიას და მოხარულები ვართ, რომ დღეს ჯილდო არის ქვეყანაში ყველაზე ცნობილი, პრესტიჟული და აღიარებული პროფესიული კონკურსი. ვფიქრობ, ამის განმაპირობებელი ერთ-ერთი მთავარი ფაქტორი არის პროექტში ჩართული საზოგადოებრივი თუ კერძო სექტორის წარმომადგენელთა წარმატებული თანამშრომლობა და განათლების სფეროსა და საზოგადოებაში აღიარებული ადამიანებით დაკომპლექტებული ჟიური. სწორედ წელს, ამ მიმართულებით გვაქვს სიახლეები, ჯილდოს ჟიურის 2 ახალი წევრი ჰყავს, ლიკა ღლონტი (პროექტის EU4Dialogue ხელმძღვანელი) და დავით გორგილაძე (მწერალი); ასევე, მხარდამჭერების რიცხვს ალტე უნივერსიტეტი შემოუერთდა. ტექნიკური თუ პროცედურული კუთხით რაიმე თვისებრივი ცვლილება არ გვაქვს. შესაბამისად, მასწავლებელთათვის ყველაფერი ნაცნობია და ველოდებით მათ აქტიურობას“, - განაცხადა განათლების კოალიციის გამგეობის თავმჯდომარემ, ირინა ხანთაძემ.

„ილიაუნი“ უკვე ტრადიციულად, 2019 წლიდან თანამშრომლობს განათლების კოალიციასთან, მასწავლებლის ეროვნული ჯილდოს კამპანიის ფარგლებში. მსგავსი ტიპის აქტივობების მიზანი ბუნებრივია არის განათლების სფეროში და განსაკუთრებით სასკოლო სფეროში მასწავლებლის პროფესიის პოპულარიზაცია და ზოგადად სასკოლო განათლების განვითარება. ილიაუნის ერთ-ერთი მნიშვნელოვანი მისია და ამოცანა არის ხელი შეუწყოს საზოგადოების წინაშე არსებულ გამოწვევებზე მეცნიერულ რეაგირებას, ამ თვალსაზრისით ილიაუნი მნიშვნელოვან როლს თამაშობს ქვეყნის და საზოგადოების მდგრადი განვითარების კუთხით. ჩვენ მიგვაჩნია, რომ დღევანდელი ქართული საზოგადოების მომავალი გრძელვადიანი განვითარების მნიშვნელოვანი ხაზი გადის განათლებაზე და ამ განათლების სისტემაში განსაკუთრებული როლი აქვს სასკოლო განათლებას. შესაბამისად, როგორც ამ კონკრეტული ჯილდოს ფარგლებში, ისე სხვა სამეცნიერო და აკადემიური პროექტებით, ილიაუნი მაქსიმალურად უჭერს მხარს ნებისმიერ პროექტსა თუ ინიციატივას, რომლის საბოლოო მიზანი სკოლის გაძლიერება, მასწავლებლის პროფესიის პოპულარიზაცია და განათლების მთელ სისტემაში ამ ძალიან მნიშვნელოვანი რგოლის სამომავლო განვითარებაა“, - განაცხადა ილიას სახელმწიფო უნივერსიტეტის ვიცერექტორმა, პროფესორმა გიორგი გვალიამ.

„ილიაუნის“ ინფორმაციით, მასწავლებლის ეროვნული ჯილდოს ვებ-გვერდზე www.tprize.ge მასწავლებლების ნომინირება და აპლიკაციების მიღება 17 მარტიდან 30 აპრილის ჩათვლით იქნება შესაძლებელი.

„წელსაც, მასწავლებლების წარდგენა შეეძლებათ ფიზიკურ პირებს, ორგანიზაციებს და საზოგადოებრივ ჯგუფებს.

კონკურსის პირველ ეტაპზე აპლიკაციები ტექნიკურად შემოწმდება, მეორე ეტაპისთვის გამოვლინდება კონკურსანტთა ათეული, ხოლო მესამე ეტაპზე, მიმდინარე წლის 5 სექტემბერს, ცნობილი გახდება იმ ხუთი ფინალისტის ვინაობა, რომელთაგან ერთ-ერთი, 5 ოქტომბერს, მასწავლებლის მსოფლიო დღეს, მასწავლებლის ეროვნული ჯილდოს მფლობელი გახდება. კონკურსანტთა შერჩევის პროცესს 20 წევრისგან დაკომპლექტებული ჟიური წარმართავს. ჟიურის შემადგენლობაში არიან განათლების სპეციალისტები, მეცნიერები, პედაგოგები და მედიის წარმომადგენლები.

კონკურსის გენერალური სპონსორია გუდავაძე-პატარკაციშვილის ფონდი, ოქროს სპონსორია ლიბერთი ბანკი. სპონსორები არიან: EPAM Georgia, კონსულტაციისა და ტრენინგის ცენტრი (ctc) და ალტე უნივერსიტეტი, ხოლო ჯილდოს მხარდამჭერები არიან: ილიას სახელმწიფო უნივერსიტეტი, განათლებისა და მეცნიერების სამინისტრო, მასწავლებელთა პროფესიული განვითარების ეროვნული ცენტრი, პირველი არხი|ტელესკოლა და ციფრული-კრეატიული სააგენტო „მავერიკი“.

„მასწავლებლის ეროვნული ჯილდოს“ კონკურსი პირველად 2017 წელს ჩატარდა, რითაც საფუძველი დაედო მასწავლებლის პროფესიის განვითარებისა და პოპულარიზაციის ყველაზე მასშტაბურ კამპანიას. მასწავლებელთა კორპუსის, განათლების სფეროს წარმომადგენლებისა და ზოგადად, საზოგადოების მხრიდან აღნიშნული პროექტი მიჩნეულ იქნა წარმატებულად და მოიპოვა პოზიტიური გამოხმაურება.

ილიას სახელმწიფო უნივერსიტეტსა და განათლების კოალიციას შორის ურთიერთთანამშრომლობის მემორანდუმი 2019 წლის 12 სექტემბერს გაფორმდა.

მემორანდუმის მიზანი იყო განათლების კოალიციის მიერ ორგანიზებული მასწავლებლის ეროვნული ჯილდოს კონკურსის ფარგლებში თანამშრომლობა, კონკურსთან დაკავშირებული თუ მისი ეგიდით მასწავლებლის პროფესიის

პოპულარიზაციაზე მიმართული სხვა ღონისძიებების უზრუნველყოფა. ილიაუნი საზეიმო ცერემონიაზე (ყოველ წელს 5 ოქტომბერს) გამოავლენს მის რჩეულ მასწავლებელს და აჯილდოებს“, - ნათქვამია „ილიაუნის“ მიერ გავრცელებულ ინფორმაციაში.