საქართველოს მედიატორთა ასოციაციასა და აფხაზეთის ავტონომიური რესპუბლიკის მთავრობას შორის ურთიერთთანამშრომლობის მემორანდუმი გაფორმდა
საქართველოს მედიატორთა ასოციაციასა და აფხაზეთის ავტონომიური რესპუბლიკის მთავრობას შორის ურთიერთთანამშრომლობის მემორანდუმი გაფორმდა. აღნიშნულის შესახებ ინფორმაციას საქართველოს მედიატორთა ასოციაცია ავრცელებს.
მათივე ცნობით, მემორანდუმი ითვალისწინებს მედიაციის პოპულარიზაციის მიზნით ერთობლივი ღონისძიებების, მრგვალი მაგიდის, კონფერენციებისა და სხვა აქტივობების დაგეგმვასა და განხორციელებას, აფხაზეთიდან დევნილ საზოგადოებაში მედიაციის შესახებ ცნობადობის ამაღლებას, მედიაციის, როგორც დავის გადაწყვეტის ალტერნატიული მექანიზმის დანერგვასა და პოპულარიზაციას.
„დოკუმენტს, საქართველოს მედიატორთა ასოციაციის თავმჯდომარემ, ირაკლი ყანდაშვილმა და აფხაზეთის ავტონომიური რესპუბლიკის მინისტრმა იუსტიციისა და სამოქალაქო ინტეგრაციის საკითხებში, ნანა გაბელიამ მოაწერეს ხელი.
ასევე, საქართველოს მედიატორთა ასოციაციის ოფისში აფხაზეთის სახელობის სამედიაციო დარბაზი გაიხსნა, რომელიც ასოციაციის თავმჯდომარემ, ირაკლი ყანდაშვილმა და მინისტრმა ნანა გაბელიამ საზეიმოდ გახსნეს. აფხაზეთის სახელობის დარბაზში სამედიაციო პროცესები გაიმართება.
საქართველოს მედიატორთა ასოციაციისთვის აფხაზეთის დარბაზის გახსნა ძალზედ მნიშვნელოვანი და სიმბოლურია, დიალოგის გზით დავის მოგვარება ის აუცილებელი პირობაა , რაზეც მედიაციის პროცესი დგას, სწორედ დიალოგი აფხაზ თანამოქალაქეებთან, არის ის ერთადერთი გზა, რომელმაც უნდა მიგვიყვანოს შერიგებამდე“,- აღნიშნულია ინფორმაციაში.
