ბადრი ჯაფარიძე - შესაკრებთა გადანაცვლებით ჯამი არ იცვლება - მთავარი, რაც გვჭირდება არჩევნების გზით „ქართული ოცნების“ ცვლილებაა

„ქართული ოცნება“ დისკრედიტირებულია, ეს კოსმეტიკური ცვლილებები იმ მიზანს ემსახურება, თითქოს რაღაც ცვლილებას აკეთებენ - მივესალმები, თუ „ქართული ოცნება“ უმრავლესობას დაკარგავს, მაგრამ ამ მოცემულობაში, როდესაც „ქართულ ოცნებას“ ასეთი მარწუხები აქვს თავის წევრებზე, ვეჭვობ, ასეთი რამ მოხდეს,- ამის შესახებ პარტია „ლელოს“ ლიდერმა, ბადრი ჯაფარიძემ „პალიტრანიუსის“ გადაცემა „360 გრადუსში“, მმართველ გუნდში მიმდინარე ცვლილებებზე საუბრისას განაცხადა.

როგორც ჯაფარიძემ აღნიშნა, „ქართული ოცნების“ შიგნით გადაადგილებები საინტერესო არ არის და შესაკრებთა გადანაცვლებით ჯამი არ იცვლება“.

„ ეს ძალა თავისი ბუნებით დესტრუქციულია. ძალაა, რომელმაც მოახერხა და მეორედ გამოიყვანა თავისი უმსგავსობის გამო ჩვენი თანამოქალაქეები ქუჩაში.

ეს არის ძალა, რომელიც დისკრედიტირებულია. ცხადია, ეს კოსმეტიკური ცვლილებები იმ მიზანს ემსახურება, რომ თითქოს რაღაც ცვლილებას აკეთებენ. მთავარი, რაც გვჭირდება, ეს არის არჩევნების გზით „ქართული ოცნების“ ცვლილება რაც შეიძლება სწრაფად, რათა ქვეყანამ ნორმალური განვითარება განაგრძოს. თუ ვინმეს მოაქვს ქვეყნისთვის საფრთხე და ქვეყნის სტაბილურ განვითარებას ემუქრება, ეს „ქართული ოცნებაა“. ეს ძალა შეცვლილი უნდა იყოს დემოკრატიული, კოალიციური მმართველობით, ამ მმართველობამ უნდა უზრუნველყოს ქვეყნის სტაბილური განვითარება“, - აღნიშნავს ჯაფარიძე.

მისივე თქმით, მაშინ, როდესაც მისთვის დეპუტატის მანდატის შეწყვეტის საკითხს ეყრებოდა კენჭი, მმართველი გუნდის რამდენიმე წევრმა უთხრა, რომ წინააღმდეგები იყვნენ მისთვის დეპუტატის მანდატის შეწყვეტის, თუმცა მაინც დაუჭირეს მხარი კენჭისყრაზე მანდატის შეწყვეტას.

„თუ „ქართული ოცნება“ უმრავლესობას დაკარგავს პარლამენტში, კენჭი ეყრება მთავრობის შემადგენლობას. მე სპეკულაციებში არ შევალ. როგორც ვიცი ორმა ადამიანმა არ მისცა ხმა{ ე.წ. აგენტების შესახებ კანონპროექტს}. დაველოდოთ, „ქართული ოცნება“ როგორ ეცდება, რომ არ დაკარგოს უმრავლესობა, ალბათ ეს არის მათი საზრუნავი. მე მივესალმები, თუ „ქართული ოცნება“ უმრავლესობას დაკარგავს. ამ მოცემულობაში, როდესაც „ქართულ ოცნებას“ ასეთი მარწუხები აქვს თავის წევრებზე, ვეჭვობ, ასეთი რამ მოხდეს.

ჩემი მანდატის შეწყვეტის დროს, ჩემთან რამდენიმე დეპუტატი იყო მოსული და თქვეს, რომ წინააღმდეგები იყვნენ ჩემთვის დეპუტატის მანდატის შეწყვეტაზე, მაგრამ მიაჭირა ღილაკს ხელი. ვერ დაგისახელებთ, ამ ადამიანების კონფიდენციალურობა უნდა შევინარჩუნო“,- აღნიშნავს ჯაფარიძე.

გარდა ამისა, მან ევროკავშირის 12 რეკომენდაციის შესრულებაზეც ისაუბრა. როგორც ჯაფარიძე აღნიშნავს, ფარისევლურია მმართველი გუნდის განცხადება, რომ 12 რეკომენდაციის შესრულება სურთ.

„ეს არის მატყუარა ძალა. ჩვენმა საზოგადოებამ იმდენი ტყუილი ნახა, რომ ფარისევლური დაპირება, რომ უნდათ 12 რეკომენდაციის შესრულება არასდროს იქნება მიღებული ჩვენი საზოგადოების მიერ.

კარგად ესმით, რომ ქართველი ხალხი მათ აღარ აპატიებთ იმ ტიპის მზაკვრობას, რომელიც ვნახეთ რუსეთის კანონის პირველი მოსმენით მიღებაზე. ძალაუფლების დაკარგვის შიში აიძულებთ ისაუბრონ ვითომდა განზრახვაზე, რომ რეკომენდაციებს შეასრულებენ“,- აღნიშნავს ჯაფარიძე.

ამასთან, მან „ნაციონალური მოძრაობის“ მიერ 9 აპრილს დაგეგმილ აქციაზე ისაუბრა და აღნიშნა, რომ პარტია „ლელო“ 9 აპრილს დაგეგმილ აქციაში მონაწილეობას არ მიიღებს.

„9 აპრილი არის ჩვენი ქვეყნის დამოუკიდებლობის აღდგენის დღე. ჩვენ დაგეგმილი გვაქვს ღონისძიებები, რომელიც ეძღვნება ჩვენი ქვეყნის დამოუკიდებლობის აღდგენის დღეს. ეს ეროვნული დღეა. არცერთ პარტიას არ აქვს უფლება, რომ მან განსაზღვროს იმ დღის წესრიგი. ჩვენ, არ გვაქვს დაგეგმილი ამ აქციაში მონაწილეობა. ჩვენ დაგეგმილი გვაქვს ჩვენი ღონისძიებები, რომელიც დამოუკიდებლობის აღდგენას ეხება. მიგვაჩნია, რომ ამ დღის მნიშვნელობაზე საუბარი არასდროს არის ზედმეტი. რაც შეეხება ამ აქციას, ვერცერთ პოლიტიკურ პარტიას ვერ დაუშლი, რომ გამოაცხადოს აქცია კონკრეტულ დღეს. ცხადია, ის პრაქტიკა, რომ ერთმა პარტიამ გამოაცხადა აქცია და სხვები უნდა შეუერთდნენ, რომელსაც საკუთარი დღის წესრიგი აქვს, არ მიმაჩნია სწორ პრაქტიკად. არც ის მიმაჩნია სწორ პრაქტიკად, რომ დამოუკიდებლობის აღდგენის დღეს სხვა დატვირთვის აქცია გამოაცხადო. ჩვენ, ჩვენი დღის წესრიგი გვაქვს“, - აღნიშნავს ჯაფარიძე.

გარდა ამისა, მან შინაგან საქმეთა ყოფილ მინისტრზე, ვანო მერაბიშვილზეც ისაუბრა და განაცხადა, რომ მის ადგილს ქართულ პოლიტიკაში ვერ ხედავს.

„მასთან დაკავშირებით ჩვენი პოზიცია მკაფიოა, ამ კაცის ადგილს ვერ ვხედავთ ქართულ პოლიტიკაში. მისი განცხადებები დამაზიანებელია ქართული პოლიტიკისთვის“,- აღნიშნავს ჯაფარიძე.

სტეპან გრიგორიანი - უახლოეს 2-3 თვეში არსებობს იმის შანსი, რომ თურქეთ-სომხეთის საზღვარი მესამე ქვეყნის მოქალაქეებისა და დიპლომატებისთვის გაიხსნას
ქართული პრესის მიმოხილვა 24.06.2024
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
კახა ოქრიაშვილი - საქართველოსთვის ევროკავშირის კანდიდატი ქვეყნის სტატუსი გაყინულია, რაც იმას ნიშნავს, რომ გაყინულია პერსპეტივა ქართველი მასწავლებლის საშუალო ხელფასი 4 500 ლარი გახდეს
კახა ოქრიაშვილი - 2016 წელს 2 მილიონი „ოცნებას“ გადავუხადე თუ პირადად ბატონ ივანიშვილს?