იაპონიის საგარეო უწყება - პრემიერ-მინისტრი უკრაინაში ვიზიტისას გამოხატავს უკრაინის მიმართ იაპონიის სოლიდარობასა ურყევ მხარდაჭერას
იაპონიის საგარეო საქმეთა სამინისტრომ დაადასტურა, რომ პრემიერ-მინისტრი ფუმიო კიშიდა სამშაბათს კიევში უკრაინისპრეზიდენტ ვლადიმირ ზელენსკის შეხვდება.
სამინისტროს მიერ გავრცელებულ განცხადებაში ნათქვამია, რომ პრემიერ-მინისტრი ფუმიო კიშიდა გამოხატავს უკრაინის მიმართ იაპონიის სოლიდარობასა და ურყევ მხარდაჭერას და ასევე, პატივისცემას უკრაინელი ხალხის გამბედაობისა და შეუპოვრობის მიმართ, რომელიც დგას საკუთარი სამშობლოს დასაცავად.
„პრემიერ-მინისტრი ფუმიო კიშიდა მტკიცედ დაგმობს უკრაინის წინააღმდეგ რუსეთის აგრესიას და სტატუს-კვოს ცალმხრივად შეცვლას ძალის გამოყენებით და კიდევ ერთხელ დაადასტურებს, რომ მოწოდებულია დაიცვას კანონის უზენაესობაზე დაფუძნებული საერთაშორისო წესრიგი“, - ნათქვამია სამინისტროს განცხადებაში.
უწყების ცნობით, პრემიერ-მინისტრი ხვალ პოლონეთს ეწვევა.
შეგახსენებთ, დღეს ცნობილი გახდა, რომ იაპონიის პრემიერი, მოულოდნელი ვიზიტით, უკრაინაში გაემგზავრა, სადაც ქვეყნის პრეზიდენტს, ვოლოდიმირ ზელენსკის შეხვდება.
