იმ კაცს, რომელიც პუტინის უდანაშაულობის პრეზუმფციაზე ლაპარაკობს კობახიძის სახით, რა დაეჯერება, რომ უნდა ევროკავშირი ? - ამის შესახებ „სტრატეგია აღმაშენებლის“ ლიდერმა გიორგი ვაშაძემ „პალიტრანიუსის“ გადაცემა „ნიუსრუმში“ განაცხადა.

ამასთან, ვაშაძემ უპასუხა „გირჩი“-„დროა“-„სტრატეგია აღმაშენებლის“ მიმართ არსებულ კრიტიკას და განაცხადა, რომ ისინი ბრიუსელში ბოდიშის მოსახდელად დადიან იმ თავდასხმისთვის, რომელსაც საქართველოს ხელისუფლება ევროპელი პარტნიორების მიმართ ახორციელებს.

„ჩვენ რაზე დავდივართ ბრიუსელში ?! ბოდიშს ვიხდით ! ბოდიშს ვუხდი მე ევროპარლამენტარებს ამათი საძაგელი თავდასხმების გამო. როცა სტრასბურგში ევროპარლამენტში მაჩერებენ და მეუბნებიან, რა ხდება საქართველოში, რატომ გვესხმიან თავს, მე ვეუბნები: „ბოდიშს გიხდით!“ მეორე, ჩვენ ვეუბნებით: „ხომ ხედავთ ხალხის არჩევანი რა არის, რუსეთისკენ საქართველო არ შეტრიალდება არასდროს, აქედან გამომდინარე, თუ არის რაიმე შანსი, მოგვეცით კანდიდატის სტატუსი და გაგვიწერეთ ვალდებულებები, რა არის კანდიდატის სტატუსისთვის შემდეგ შესასრულებელი“. ესენი რას აკეთებენ?! რუსულ კანონს აინიცირებენ. რა, არ იცოდნენ, რომ ეს პირდაპირ წინააღმდეგობაში იყო ? შარშან რომ მოსმენების კანონი მიიღეს, არ იცოდნენ ?

ჩვენ ვაგროვებთ მილიონ ხელმოწერას დღეს, ჩვენ ვაგროვებთ ხელმოწერებს იმისთვის, რომ ჩავიტანოთ ბრიუსელში და ევროპულ დედაქალაქებში. ჩვენ ვსაუბრობთ ზუსტად იმ ენით, რა ენითაც უნდა ისაუბროს პროდასავლურმა, ევროპისკენ მიმართულმა საქართველოს ხელისუფლებამ. ჩვენ ვაქარწყლებთ იმ მძიმე წარმოდგენებს, რომლებიც საქართველოზე აქვთ, ჩვენ ვმუშაობთ იმისთვის, რომ უკრაინაში საქართველოსთან დაკავშირებით ბოლომდე არ გაფუჭდეს იმიჯი. ენაზე ვინ ექაჩებათ თავს რომ ესხმიან, ომის პარტიას რომ ეძახიან და ჰგონიათ, რომ მაგარი ბიჭები არიან. კორუმპირებულებს რომ ეძახიან ევროპარლამენტარებს, თავის გარშემო მიმოიხედონ და თავის თავში ჩაიხედონ, გათხვრილები რომ არიან კორუფციაში“,- განაცხადა ვაშაძემ.

მან სამი პუნქტი დაასახელა, რომელიც, ოპოზიციონერი დეპუტატის აზრით, უზრუნველყოფს საქართველოსთვის ევროკავშირის კანდიდატის სტატუსის მიღებას.

„რომ არა ეს პროტესტი და რუსული კანონის იძულებითი გაწვევა „ქართული ოცნების“ მხრიდან, ფაქტობრივად, ნულის ტოლი იყო შანსი, რომ კანდიდატის სტატუსი მიგვეღო. ახლა შანსი გაჩნდა იმიტომ, რომ მთელმა ევროპამ, ამერიკამ, ცივილიზებულმა სამყარომ დაინახა, რომ ქართველ ხალხს ღვიძავს და რუსული დეზინფორმაცია მასზე არ მოქმედებს, რომ რუსეთისკენ ჩვენ ვერავინ შეგვატრიალებს. ამან გააჩინა პოზიტიური განწყობები და დამოკიდებულება საქართველოსთან მიმართებით და ეს არის ხალხის, ახალგაზრდების დამსახურება.

სამი რამ არის საჭირო, რომ ჩვენ მივიღოთ ევროკავშირის კანდიდატის სტატუსი.

პირველი - 12 პუნქტის განუხრელად შესრულება და არა ცრუ „ფეიკ“ რეფორმები, რასაც ისინი აკეთებენ.

მეორე - უკრაინასთან ურთიერთობის დალაგება.

და მესამე - უნდა შეწყდეს რუსული დეზინფორმაციისთვის დამახასიათებელი რიტორიკით თავდასხმა ჩვენს პარტნიორებზე. ფორმულა არის ეს“, - განაცხადა ვაშაძემ.