თუ ფაქტები არ მაქვს, კომუნიკაციების კომისიის თავმჯდომარე ვერც ერთ მაუწყებელზე ვერ იტყვის ომის პროპაგანდას ეწევა თუ არა, - ასე უპასუხა კომუნიკაციების ეროვნული კომისიის ხელმძღვანელმა კახა ბექაურმა “ალტ ინფოსთან“ დაკავშირებით პარლამენტის პლენარულ სხდომაზე დასმულ კითხვას, სადაც მან ყოველწლიური ანგარიში წარადგინა.

უფრო კონკრეტულად, პარლამენტის სხდომაზე ოპოზიციონერმა დეპუტატმა თეონა აქუბარდიამ კახა ბექაურს “ალტ ინფოს“ საქმიანობის შეფასება სთხოვა და ამ კონტექსტში ტელევიზიის ეთერით გასულ გადაცემებში ომის პროპაგანდაზე დაუსვა კითხა.

აქუბარდიამ აღნიშნა, რომ ომის პროპაგანდა კანონით აკრძალულია.

“როგორც მახსოვს ომის პროპაგანდასთან დაკავშირებით ჩვენთან ერთი "ქეისი" იყო და შესაბამისად კომისიის გადაწყვეტილება არსებობს. კომუნიკაციების კომისიის თავმჯდომარე ვერც ერთ მაუწყებელზე ვერ იტყვის ომის პროპაგანდას ეწევა თუ არა, თუ ფაქტები არ მაქვს... რა თქმა უნდა, ომის პროპაგანდა აკრძალულია და თუ ასეთს რომელიმე ტელევიზია გააკეთებს, ჩვენი მონიტორინგის ან საჩივრის მეშვეობით ჩვენი თვალთახედვის არეალში მოხვდება. გარწმუნებთ, რომ აუცილებლად ვირეაგირებთ - ეს “ალტ ინფო“ თუ სხვა მაუწყებელი იქნება ამას მნიშვნელობა არა აქვს“, - განაცხადა ბექაურმა პარლამენტის სხდომაზე.