ვლადიმერ პუტინი უკრაინაში მშვიდობას არ გეგმავს და ამიტომ დასავლეთი უნდა მოემზადოს კიევისთვის ლეტალური დახმარების კიდევ დიდი ხნის განმავლობაში მიწოდებისთვის, - ამის შესახებ ნატო-ს გენერალურმა მდივანმა, იენს სტოლტენბერგმა Guardian-თან ინტერვიუში განაცხადა.

”პრეზიდენტი პუტინი არ ემზადება მშვიდობისთვის, ის ემზადება უფრო მეტი ომისთვის,” -განაცხადა სტოლტენბერგმა და დასძინა, რომ რუსეთი ზრდის სამხედრო ინდუსტრიულ წარმოებას და ”მიმართავს ავტორიტარულ რეჟიმებს, როგორიცაა ირანი, ჩრდილოეთ კორეა და სხვები და ცდილობს მეტი იარაღის მოპოვებას”.

ნატო-ს ხელმძღვანელმა ხაზი გაუსვა, რომ აშშ, გაერთიანებული სამეფო, საფრანგეთი, გერმანია და სხვა დასავლური სახელმწიფოები მზად უნდა იყვნენ, მხარი დაუჭირონ უკრაინას დიდი ხნის განმავლობაში იარაღით, საბრძოლო მასალისა და სათადარიგო ნაწილებით.

„საჭიროება კვლავ იქნება, რადგან ეს არის გამოფიტვის ომი; ეს ეხება ინდუსტრიულ შესაძლებლობებს მხარდაჭერის შესანარჩუნებლად“, - აღნიშნა ალიანსის გენერალურმა მდივანმა.

მან არ გამორიცხა, რომ ნატო-ს წევრმა ქვეყნებმა მომავალში უკრაინაში F-16-ების ან სხვა დასავლური საბრძოლო თვითმფრინავების გაგზავნის გადაწყვეტილება მიიღონ.