უკრაინის პრეზიდენტი, ვოლოდიმირ ზელენსკი ხერსონის ოლქს ეწვია და ადგილობრივ მოსახლეობას შეხვდა.

„სამუშაო მოგზაურობა ხერსონის ოლქში. სოფელი პოსად-პოკროვსკე, სადაც რუსული სრულმასშტაბიანი აგრესიის შედეგად მრავალი სახლი და სოციალური ინფრასტრუქტურის ობიექტი დაზიანდა. ადგილობრივ მოსახლეობას აქტუალურ საკითხებსა და საჭიროებებზე გავესაუბრე. ყველაფერს აღვადგენთ, ყველაფერს ავაშენებთ. ისევე როგორც ყველა ქალაქსა და სოფელს, რომელიც ოკუპანტებმა დააზარალეს“, - წერს ზელენსკი „ტელეგრამზე“.

პრეზიდენტმა, ვიზიტის დროს, სახელმწიფო ჯილდოები გადასცა უკრაინელ სამხედროებს, რომლებიც ხერსონის ოლქის დაცვაში არიან ჩართულები. სამხედროებმა კი პრეზიდენტ ზელენსკის აჩუქეს საათი, რომელზედაც უკრაინის გერბია გამოსახული და მოწინააღმდეგის კუთვნილი განადგურებული ქვემეხის ლულისგან დამზადებული ყირიმის რუკა გადასცეს.