ესტონეთმა კიდევ ერთი რუსი დიპლომატი პერსონა ნონ გრატად გამოაცხადა და მან ქვეყანა 29 მარტამდე უნდა დატოვოს, - ინფორმაციას რუსული მედია ესტონეთის საგარეო საქმეთა სამინისტროზე დაყრდნობით ავრცელებს.

„დღეს, 24 მარტს, ესტონეთის საგარეო საქმეთა სამინისტრომ რუსეთის საელჩოს საქმეთა დროებითი რწმუნებული დაიბარა და წარუდგინა დიპლომატიური ნოტა, რომლითაც საელჩოს თანამშრომელი პერსონა ნონ გრატად გამოცხადდა. აღნიშნული პირის ქმედებები დიპლომატიური ურთიერთობების შესახებ ვენის კონვენციას არღვევდა“, - ნათქვამია ესტონეთის საგარეო საქმეთა სამინისტროს განცხადებაში.

საინფორმაციო სააგენტო „რია ნოვოსტის“ ინფორმაციით, რუსეთის საგარეო საქმეთა სამინისტროში აცხადებენ, რომ მოსკოვი კიდევ ერთი რუსი დიპლომატის ესტონეთიდან გაძევებასთან დაკავშირებით ტალინის გადაწყვეტილებას უპასუხებს.