უკრაინამ რუსეთის ფედერაციას ყველა მძიმედ დაჭრილი ტყვედ ჩავარდნილი ჯარისკაცი გადასცა, - ინფორმაციას უკრაინული მედია სამხედრო ტყვეებთან დაკავშირებულ საკითხებზე მომუშავე საკოორდინაციო შტაბზე დაყრდნობით ავრცელებს.

„საერთაშორისო ვალდებულებების შესაბამისად, ჟენევის კონვენციების 109-114 მუხლების თანახმად და წითელი ჯვრის საერთაშორისო კომიტეტის მონაწილეობით, უკრაინამ რუსულ მხარეს ცალმხრივად გადასცა მძიმედ დაჭრილი და მძიმედ დაავადებული სამხედრო ტყვეები“, - აცხადებენ საკოორდინაციო შტაბში.

მათივე განცხადებით, საუბარია არა სამხედრო ტყვეების გაცვლაზე, არამედ რეპატრიაციაზე, მძიმედ დაჭრილი ტყვეების პირობების გარეშე დაბრუნებაზე, როგორც ამას საერთაშორისო ჰუმანიტარული სამართალი ითვალისწინებს.

„ამავდროულად, აგრესორი სახელმწიფო, სისტემატურად უგულებელყოფს საერთაშორისო ნორმებს, კვლავ ტყვეობაში ჰყავს უკრაინის ათასობით მოქალაქე, მათ შორის მძიმედ დაავადებულები და დაჭრილები, სამოქალაქო პირები, ბავშვები, ქალები და მოხუცები“, - აცხადებენ საკოორდინაციო საბჭოში.

უკრაინა საერთაშორისო საზოგადოებას მოუწოდებს, გაზარდოს ზეწოლა რუსეთზე, რათა აიძულოს ის, დაიცვას საერთაშორისო ჰუმანიტარული სამართლის წესები და უკრაინის ყველა უკანონოდ დაკავებული მოქალაქე ტყვეობიდან გაათავისუფლოს.