მთაწმინდის რაიონში, წავკისში, აღმაშენებლის ქუჩის სრული რეაბილიტაცია დასრულდა. ამის შესახებ ინფორმაციას თბილისის მერია ავრცელებს.

მათი ინფორმაციით, სამუშაოები ორ ეტაპად ჩატარდა და საგზაო ინფრასტრუქტურის მოწესრიგებამდე, გამოიცვალა შიდა კომუნიკაციები - წყალარინების სისტემა და სანიაღვრე ქსელი.

როგორც თბილისის მერიაში აღნიშნავენ, პროექტის ფარგლებში, ასფალტის ორფენიანი საფარი ჯამში, 10 000 კვ.მ ფართობზე მოწესრიგდა. ასევე, მოეწყო ბორდიური.

ბოლო ეტაპის სამუშაო პროცესს თბილისის მერის მოადგილე კახა გულედანი მთაწმინდის რაიონის გამგებელთან, დავით კირკიტაძესთან ერთად გაეცნო.

„აღნიშნულ ქუჩაზე საავტომობილო გზა სრულად ამორტიზებული იყო და ადგილობრივ მოსახლეობას გადაადგილება უჭირდა, განსაკუთრებით უხვი ნალექის დროს. შესაბამისად, აღმაშენებლის ქუჩის რეაბილიტაცია მნიშვნელოვნად მივიჩნიეთ და დაახლოებით, ორი კილომეტრზე დაიგო ასფალტის საფარი. მსგავსი სიტუაცია ბევრ ქუჩაზეა და ეტაპობრივად მოწესრიგდება. მიმდინარე წელს, წავკისში 9 ძმა ხერხეულიძისა და სააკაძის ქუჩების რეაბილიტაციაცაა დაგეგმილი“, - განაცხადა დავით კირკიტაძემ.

ინფრასტრუქტურული პროექტი, გამგეობის დაკვეთით, კონტრაქტორმა კომპანიამ „პარმა“ შეასრულა და ჯამში, ქუჩის სრული რეაბილიტაციისთვის 1 200 000 ლარამდე დაიხარჯა.