ლიეტუვის საგარეო საქმეთა სამინისტროში აცხადებენ, რომ ბელარუსში ტაქტიკური ბირთვული იარაღის განლაგების გეგმის საპასუხოდ რუსეთის წინააღმდეგ ახალი სანქციების დაწესებას მოითხოვს.

სამინისტროს ცნობით, ეს არის "ორი არაპროგნოზირებადი დიქტატორული რეჟიმის კიდევ ერთი მცდელობა დაემუქროს მათ მეზობლებს და მთელ ევროპულ კონტინენტს". უწყებაში აცხადებენ, რომ სწორედ ეს საკითხი იქნება ევროატლანტიკურ პარტნიორებთან დაგეგმილი დისკუსიის ნაწილი.

„ეს არის პუტინისა და ლუკაშენკოს საშინელი ნაბიჯები ევროპაში დაძაბულობისა და დესტაბილიზაციის მორიგი ტალღის შესაქმნელად. ეს ქმედებები ბელარუსს კიდევ უფრო უბიძგებს უკრაინასთან ომისა და დემოკრატიულ სამყაროსთან დაპირისპირებისკენ“, - ნათქვამია სამინისტროს განცხადებაში.

ლიეტუვის საგარეო უწყებაში აცხადებენ, რომ ბელარუსი დამატებითი რისკის ფაქტორია ბალტიის რეგიონისთვის.

„ბელარუსი, რომელიც სულ უფრო კარგავს თავის სუვერენიტეტს, მხარს უჭერს და ეხმარება რუსეთის აგრესიას და უფრო და უფრო მჭიდროდ ინტეგრირდება რუსეთის სამხედრო გეგმებში, ბალტიის რეგიონისთვის დამატებითი რისკის ფაქტორია“, - დასძინა სამინისტრომ.