უკრაინის პრეზიდენტი ვოლოდიმირ ზელენსკი ზაპოროჟიეში ვიზიტისას ატომური ენერგიის საერთაშორისო სააგენტოს (IAEA) გენერალურ დირექტორს რაფაელ გროსის შეხვდა.

შეხვედრის ამსახველი ფოტოები „ტვიტერის“ საკუთარ ოფიციალურ გვერდზე გროსიმ გამოაქვეყნა.

„დღეს ზაპოროჟიეში უკრაინის პრეზიდენტს, ვოლოდიმირ ზელენსკის შევხვდი. ზაპოროჟიეს ატომური ელექტროსადგურისა და მისი პერსონალის დაცვაზე მოსაზრებები გავცვალეთ. მე კიდევ ერთხელ დავუდასტურე ატომური ენერგიის საერთაშორისო სააგენტოს სრული მხარდაჭერა უკრაინის ბირთვული ობიექტების მიმართ“, - განაცხადა გროსიმ.

შეგახსენებთ, ზაპოროჟიეს ბირთვული ობიექტი ევროპის უდიდესი ატომური ელექტროსადგურია, რომლის ოკუპირებაც რუსულმა ძალებმა გასული წლის მარტიდან მოახდინეს.