თეთრი სახლის პრესმდივნის განცხადებით, ამერიკის შეერთებული შტატები ისრაელის სასამართლო სისტემის რეფორმის გადადებას მიესალმება.

„ჩვენ მივესალმებით ამ განცხადებას, როგორც შესაძლებლობას შეიქმნას დამატებითი დრო და სივრცე კომპრომისისთვის. კომპრომისი არის ზუსტად ის, რისკენაც ჩვენ მოვუწოდებთ“, - განაცხადა პრესმდივანმა კარინ ჟან-პიერმა.

მისივე თქმით, ოფიციალური ვაშინგტონი განაგრძობს ისრაელის ლიდერების მიმართ მოწოდებას, რაც შეიძლება მალე იპოვონ კომპრომისი.

„დემოკრატიული საზოგადოებები ძლიერდება კონტროლისა და ბალანსის საშუალებით და დემოკრატიულ სისტემაში ფუნდამენტური ცვლილებები უნდა განხორციელდეს სახალხო მხარდაჭერის რაც შეიძლება ფართო საფუძვლით“, - აღნიშნა ჟან-პიერმა.

ისრაელის სასამართლო სისტემის რეფორმის გადადებას მიესალმა აშშ-ს სახელმწიფო დეპარტამენტიც.