რუსეთმა, მის მიერ შეთავაზებული რეზოლუციის დასამტკიცებლად, გაერო-ს უშიშროების საბჭოში საკმარისი ხმების მოპოვება ვერ შეძლო.

რეზოლუცია „ჩრდილოეთის ნაკადის“ მილსადენებზე განხორციელებულ თავდასხმებთან დაკავშირებით გამოძიების ჩატარებას ითვალისწინებდა.

რუსეთის მიერ შეთავაზებულ რეზოლუციას მხარი მხოლოდ სამმა ქვეყანამ დაუჭირა, 12-მა კი თავი შეიკავა. მის მისაღებად სულ მცირე ცხრა ხმა იყო საჭირო.

რეზოლუციას მხარი დაუჭირეს რუსეთმა, ჩინეთმა და ბრაზილიამ. ალბანეთმა, გაერთიანებულმა სამეფომ, გაბონმა, განამ, მალტამ, მოზამბიკმა, არაბთა გაერთიანებულმა საამიროებმა, აშშ-მა, საფრანგეთმა, შვეიცარიამ, ეკვადორმა და იაპონიამ თავი შეიკავეს.

რეზოლუციის თანაავტორები იყვნენ ბელარუსი, ვენესუელა, ჩრდილოეთი კორეა, ნიკარაგუა, სირია და ერითრეა. თუმცა ისინი უშიშროების საბჭოს წევრები არ არიან და კენჭისყრაში მონაწილეობა არ მიუღიათ.