ირანის საგარეო საქმეთა მინისტრი, ჰოსეინ ამირ-აბდოლაჰიანი ოფიციალური ვიზიტით მოსკოვს ეწვია, - ინფორმაციას რუსული მედია ავრცელებს.

„ერთ-ერთი საკითხი, რომელიც ლავროვთან შეხვედრის დროს წამოიჭრება, ირანის ბირთვულ პროგრამაზე „ერთობლივი ყოვლისმომცველი სამოქმედო გეგმა” იქნება. რუსეთმა ეფექტური როლი ითამაშა ვენაში, 4+1 ფორმატში გამართული მოლაპარაკებების ახალ რაუნდში, რომელიც რამდენიმე თვის განმავლობაში გაგრძელდა. ჩვენი რუსი კოლეგები აგრძელებენ თავიანთი ვალდებულებების შესრულებას მხარეების მოლაპარაკების მაგიდასთან დაბრუნებასთან დაკავშირებით“, - განაცხადა ირანის საგარეო საქმეთა მინისტრმა.

ირანის საგარეო საქმეთა სამინისტრომ “ტელეგრამის“ არხზე დაწერა, რომ ჰოსეინ ამირ-აბდოლაჰიანის ვიზიტის დროს, მხარეები განიხილავენ ორმხრივი ურთიერთობების სხვადასხვა ასპექტს, ასევე რეგიონული და საერთაშორისო დღის წესრიგის ცალკეულ საკითხებს.