ძალიან ცუდ მდგომარეობაშია, ცარიელი ძვალი და ტყავია ადამიანი, ვერ მოძრაობს, - ამის შესახებ საქართველოს ყოფილი პრეზიდენტის, მიხეილ სააკაშვილის დედამ, გიული ალასანიამ, „ვივამედთან“ ჟურნალისტებს განუცხადა.

მისი თქმით, სააკაშვილთან ექიმი „ყოველ წუთს შედის, რაღაც ტაბლეტებს აძლევს“ და თავად არასდროს გაუგია, რომ ის მიღებაზე უარს ამბობდეს.

„ხან იძახიან, რომ იკლებს, ხან იძახიან, რომ იმატებს. თურმე არ ჭამს, მაგრამ იმატებს, ეს როგორ ხდება, არ ვიცი. ვხედავ, რომ ძალიან ცუდ მდგომარეობაშია, ცარიელი ძვალი და ტყავია ადამიანი. ვერ მოძრაობას. არანაირი ძალა აღარ აქვს“, - განაცხადა გიული ალასანიამ.

რაც შეეხება სააკაშვილის მკურნალობის პროცესში პოლონელი ექიმების ჩართვას, ალასანია ამბობს, რომ ამის შესახებ ზუსტი ინფორმაცია არ აქვს, თუმცა იცის, რომ პოლონელი ექიმები ამისთვის მზად არიან.

„ვიცი, რომ ისინი მზად არიან, გამზადებულია სპეცრეისი შესაბამისი აღჭურვილობით, რაც შესაძლებლობას მისცემს მათ, რომ საჭირო ანალიზები ჩაატარონ“, - განაცხადა გიული ალასანიამ.

გარდა ამისა, ალასანიამ უპასუხა კითხვას, სააკაშვილისთვის სასჯელის გადავადების ან მისი სასჯელისგან გადავადების თაობაზე სტრასბურგის სასამართლოში სარჩელის შეტანის შესახებ და აღნიშნა, რომ სარჩელი მას შემდეგ გაიგზავნება, რაც სააკაშვილს სახალხო დამცველის კონსილიუმის ექიმები მოინახულებენ და დასკვნას დადებენ.