უნგრეთის პრეზიდენტის, კატალინ ნოვაკის განცხადებით, უკრაინის კონფლიქტთან დაკავშირებით მხარს უჭერს სამშვიდობო გეგმას, რომელიც რუსეთის გამარჯვებას არ ითვალისწინებს.

„ჩვენ გვჭირდება სამშვიდობო გეგმა, რომელიც რუსეთის გამარჯვებას არ მოიცავს. ჩვენი საერთო მიზანია, რუსეთმა გაიყვანოს თავისი ჯარები უკრაინის ტერიტორიებიდან“, - განაცხადა კატალინ ნოვაკმა ანკარაში, თურქეთის პრეზიდენტთან, რეჯეფ თაიფ ერდოღანთან შეხვედრის შემდეგ.

მან ერდოღანს უკრაინასა და რუსეთს შორის შუამავლის როლის შესრულებისთვის მადლობა გადაუხადა.

„საბოლოო მიზანი არის მშვიდობა და ყველაფერი უნდა გაკეთდეს იმისათვის, რომ არ მოხდეს ომის ესკალაცია. მეომარი მხარეები მოლაპარაკების მაგიდასთან უნდა დასხდნენ. საჭიროა სამშვიდობო გეგმა“, - აღნიშნა უნგრეთის პრეზიდენტმა.