შვეიცარიაში გაასამართლეს ოთხი ბანკირი, რომლებიც რუსეთის პრეზიდენტის, ვლადიმერ პუტინის ახლო მეგობარს, სერგეი როლდუგინს მილიონობით ფრანკის შვეიცარიის საბანკო ანგარიშებზე გადატანაში დაეხმარა.

მედიის ინფორმაციით, სამი რუსი და ერთი შვეიცარიელი მამაკაცი ციურიხის რაიონულ სასამართლოში გამართულ მოსმენაზე დამნაშავედ ცნეს და თითოეულს შვიდთვიანი პირობითი სასჯელი მიუსაჯეს. გავრცელებული ინფორმაციით, სერგეი როლდუგინმა 2014-2016 წლებში შვეიცარიის საბანკო ანგარიშებზე 50 მილიონი აშშ დოლარი განათავსა ისე, რომ თანხის წარმომავლობის შესახებ სათანადო განმარტება არ გაუკეთებია.

შვეიცარიის კანონმდებლობის თანახმად, ბანკებს მოეთხოვებათ უარი თქვან ანგარიშების გახსნაზე, ან დახურონ ანგარიშები, თუ მათ აქვთ ეჭვი ანგარიშის მფლობელთან ან ფულის წყაროსთან დაკავშირებით.

აღსანიშნავია, რომ სერგეი როლდუგინი ვლადიმერ პუტინის უფროსი შვილის, მარიას ნათლიაა. მას ზოგჯერ „პუტინის საფულედაც“ მოიხსენიებენ.