სომხეთის პრემიერ-მინისტრის, ნიკოლ ფაშინიანის განცხადებით, აზერბაიჯანმა რუსეთის სამშვიდობო ძალების პასუხისმგებლობის ზონაში მორიგი შეჭრა განახორციელა.

სომხეთის პრემიერის თქმით, გასულ კვირას ლაჩინის დერეფნის გარშემო, რომელიც მთიან ყარაბაღსა და სომხეთს ერთმანეთთან აკავშირებს, ვითარება ამდაგვარი იყო: „აზერბაიჯანმა არა მხოლოდ განაგრძო უკანონო ბლოკირება, არამედ განახორციელა მორიგი შეჭრა მთიან ყარაბაღში რუსეთის სამშვიდობო ძალების პასუხისმგებლობის ზონაში.

ნიკოლ ფაშინიანის მტკიცებით, შეჭრის ფაქტი რუსეთის თავდაცვის უწყებამაც დააფიქსირა.

„ამრიგად, შეგვიძლია განვაცხადოთ, რომ აზერბაიჯანი არა მხოლოდ არ ასრულებს საერთაშორისო სასამართლოს გადაწყვეტილებას, არამედ კიდევ უფრო ამძიმებს ვითარებას მთიან ყარაბაღში და დგამს ნაბიჯებს, რომლებიც მიმართულია შიდა სატრანსპორტო კავშირების დაბლოკვისკენ“, - განაცხადა ფაშინიანმა.

მისი თქმით, ახალი სიმაღლეების დაკავებით, ბაქოს სამიზნეში აღმოჩნდა გრუნტიანი გზა, რომელიც სტეპანაკერტს შუშის რაიონის რამდენიმე სოფელთან აკავშირებს.

„აზერბაიჯანი ამას სომხეთიდან მთიან ყარაბაღში სამხედრო ტვირთისა და პერსონალის სავარაუდო გადაყვანით ხსნის. ეს ინფორმაცია სრულიად შეუსაბამოა სინამდვილესთან. ინფორმაცია სამხედრო გადაზიდვების შესახებ პროპაგანდისტული სიცრუეა, რომლის მიზანია ლეგიტიმაციის შექმნა შესაძლო ესკალაციისთვის“, - განაცხადა ფაშინიანმა.