რუსთაველის გამზირზე, პარლამენტის შენობის წინ, 7-8 მარტს, ე.წ. აგენტების შესახებ კანონის საწინააღმდეგო აქციაზე პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებული ლაზარე გრიგორიადისის მხარდასაჭერი აქცია გაიმართა.

აქციის მონაწილეების თქმით, მათი მოთხოვნაა გაათავისუფლონ ლაზარე გრიგორიადისი და შეწყვიტონ 7-8 მარტის აქციის მონაწილეების დევნა.

"ჩვენი თანამებრძოლი დაიჭირეს, რომელიც 7-8 მარტის აქციებზე ჩვენთან ერთად იბრძოდა და ერთად ვიცავდით ჩვენი ქვეყნის მომავალს.

ჩვენმა ავტოკრატიულმა სახელმწიფომ გადაწყვიტა, რომ დაეჭირა და შესაბამისად, ჩვენ გამოვედით მის დასაცავად. ჩვენი მომავალი საფრთხის ქვეშაა.

ჩვენ სოლიდარობას ვუცხადებთ ლაზარეს და ჩვენი მოთხოვნაა, გაათავისუფლონ და შეწყვიტონ ხალხის დევნა", - განაცხადა აქციის ორგანიზატორმა ბესარიონ ჯღარკავამ.