აშშ-ში ტორნადოს მინიმუმ 4 ადამიანი ემსხვერპლა

აშშ-ის არკანზასის, ილინოისის, აიოვას, ვისკონსინის, მისისიპისა და ტენესის შტატებს ტორნადო დაატყდა თავს.

სტიქიის შედეგად არკანზასის შტატში მინიმუმ სამი ადამიანი დაიღუპა, 50 მოქალაქე კი ჰოსპიტალიზებულია. ილინოისის შტატის ქალაქ ბელვიდერში მდებარე „აპოლოს თეატრში“ ძლიერი ქარის შედეგად სახურავი ჩამოინგრა, რის შედეგადაც ერთი ადამიანი დაიღუპა და ათობით დაშავდა.

ქარიშხლით დაზარალებულ შტატებში 300 000-მდე აბონენტი ელექტროენერგიის გარეშეა დარჩენილი. სტიქიამ დააზიანა საცხოვრებელი სახლები და სხვა შენობები, ავტომობილები, ელექტროგადამცემი ხაზები.

სოციალურ ქსელებში ვრცელდება ფოტოები და კადრები, სადაც ჩანს, რომ ზოგიერთ ტერიტორიაზე გზები ბლოკირებულია ჩამოგდებული ელექტრო ბოძებითა და მოგლეჯილი ხეებით.