პოლონეთისა და სლოვაკეთის გადაწყვეტილება “მიგ-29” ტიპის ავიაგამანადგურებლების უკრაინისთვის გადაცემასთან დაკავშირებით სხვებისთვის მაგალითი უნდა იყოს. ამის შესახებ პოლონეთის მინისტრმა ევროკავშირის საკითხებში შიმონ შინკოვსკიმ გერმანულ გამოცემა RND-თან ინტერვიუში განაცხადა.

მისი თქმით, გერმანია უკრაინის დასახმარებლად პრაქტიკული გზების გამონახვის ნაცვლად ხშირად ფორმალობითაა დაკავებული.

„დაიჭირეთ სიკეთის მხარე არა მხოლოდ სიტყვით, არამედ საქმითაც“, - აღნიშნა შიმონ შინკოვსკიმ.

უკრაინის ხელისუფლებამ არაერთხელ მოუწოდა მოკავშირეებს, თანამედროვე საბრძოლო თვითმფრინავები გადასცენ, რომლებსაც შეუძლიათ დაეხმარონ უკრაინას ცის დაცვასა და კონტრშეტევის განხორციელებაში. მარტში, პოლონეთის პრეზიდენტი ანჯეი დუდა უკრაინას „მიგ-29” ტიპის ოთხი თვითმფრინავის მიწოდებას დაჰპირდა. მოგვიანებით, სლოვაკეთმა გამოაცხადა, რომ უკრაინას „მიგ-29” ტიპის 13 თვითმფრინავს გადასცემს. აღსანიშნავია, რომ ქვეყანამ უკრაინას პირველი ოთხი ავიაგამანადგურებელი უკვე გადასცა.