ადვოკატ პაატა გოგალაძის განცხადებით, სასტუმრო „ამბასადორში“ გაჩენილი ხანძრის საქმეზე ბრალდებულის პოზიცია არ შეცვლილა, ის დუმილის უფლებას იყენებს და თავს დამნაშავედ არ ცნობს. ამის შესახებ ადვოკატმა ჟურნალისტებს სხდომის დაწყებამდე განუცხადა.

ასევე, კითხვაზე, რა პოზიცია აქვს ბრალდებულს გავრცელებულ ინფორმაციაზე, რომლის თანახმად, მან კაზინოში თანხა წააგო, რის მერეც ცეცხლი გააჩინა, ადვოკატის თქმით, ბრალდებული დეტალებზე არ საუბრობს, მაგრამ ის, რომ კაზინოში იმყოფებოდა, საქმის მასალებიდან არ დგინდება.

„ფსიქიატრიული ექსპერტიზა დანიშნულია, ბრალდების მიერ რაც არის გავრცელებული. შესაბამისად, ის კანონით დადგენილ ვადებში ჩატარდება. აუცილებლად მოხდება სტაციონარში მოთავსება, მაგრამ ეს შემხებლობაში არ იქნება იმ გამოძიებასთან, რაც ფაქტზე მიმდინარეობს. ჩვენი შუამდგომლობა დამოკიდებულია იმაზე, თუ რა პოზიცია ექნება ბრალდებას, როგორი შუამდგომლობით შემოვა და რას მოითხოვს, მაგრამ ერთი თავიდანვე გასაგებია, რადგანაც ის დუმილის უფლებას იყენებს, თავს დამნაშავედ არ სცნობს. ჩვენი პოზიციაა, რომ არ უნდა იყოს შეფარდებული არცერთი სახის აღკვეთის ღონისძიება“, - განაცხადა პაატა გოგალაძემ.

მისი თქმით, არსებობს ის საჯარო მტკიცებულებები, რომელიც ტელევიზიებმა გადაიღეს და ამის შემდეგ უკვე არანაირი დამადასტურებელი მტკიცებულება არ არსებობს.

„დანიშნულია ქიმიური ექსპერტიზა ხანძრის გამომწვევ მიზეზზე. აღნიშნულიდან გამომდინარე, ჯერ დადგენილი არ არის წარმომავლობა, რა მოტივით და ვის მიერ. ჩემი დაცვის ქვეშ მყოფი არ არის ვალდებული ამტკიცოს უდანაშაულობა, ეს ბრალდებამ უნდა დაამტკიცოს მისი დანაშაული. მას ფინანსური პრობლემა არ აქვს”, - განაცხადა პაატა გოგალაძემ.

ცნობისთვის, სამართალდამცავებმა სასტუმრო „ამბასადორში“ ხანძრის გაჩენის ფაქტზე 28 წლის მამაკაცი დააკავეს. შინაგან საქმეთა სამინისტროს ცნობით, მამაკაცმა, რომელიც სასტუმროში სტუმრად იმყოფებოდა, ხანძარი გააჩინა, რაც სასტუმროს მესამე და მეოთხე სართულზე გავრცელდა.

გამოძიება საქართველოს სისხლის სამართლის 187-ე მუხლის მე-2 ნაწილის "ა" ქვეპუნქტით მიმდინარეობს, რაც ცეცხლის წაკიდებით ნივთის დაზიანებას ან განადგურებას გულისხმობს.