იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია, პირველ მოადგილე გიორგი გაბედავასთან ერთად, რომის სამრევლოს საკვირაო სკოლის მოსწავლეებს შეხვდა და სპეციალურად მათთვის შეძენილი საჩუქრები გადასცა. ამის შესახებ ინფორმაციას აფხაზეთის მთავრობა ავრცელებს.

მათივე ცნობით, შეხვედრაში რომის სამრევლოს წინამძღვარი არქიმანდრიტი იოანე ხელაია და სკოლის პედაგოგები მონაწილეობდნენ.

ინფორმაციის თანახმად, სკოლაში ამ ეტაპზე 40 მოსწავლე სწავლობს, მათ შორის არიან აფხაზეთიდან დევნილი ბავშვებიც, რომლებიც ქართულ ენასა და ლიტერატურას, საქართველოს ისტორიას, ქართულ ხალხურ ცეკვასა და მუსიკას სწავლობენ.

„ჩვენთვის ცნობილია რომ სკოლაში „ფესვები“ ქართულ-აფხაზური ურთიერთობებისა და კულტურის პოპულარიზაციის მიზნით ხშირად ეწყობა კულტურული საღამოები და სხვადასხვა საინტერესო ღონისძიებები. მინისტრის აპარატი, შესაძლებლობის ფარგლებში, ყოველთვის მზადაა მხარი დაუჭიროს ჩვენი მოზარდებისთვის აუცილებელ და სასარგებლო აქტივობებს“, - აღნიშნა ნანა გაბელიამ.