ჯანდაცვის მინისტრის ზურაბ აზარაშვილის განცხადებით, უწყება ონკოლოგიური მედიკამენტების შესყიდვასთან დაკავშირებით მოლაპარაკებებს პირდაპირ მწარმოებლებთან აწარმოებს.

როგორც მან მთავრობის სხდომის დასრულების შემდეგ ჟურნალისტებს განუცხადა, პირდაპირი შესყიდვის გზით შესაძლებელი იქნება ონკოლოგიურ პაციენტებს მედიკამენტებზე სრული წლის საჭიროება დაუფინანსდეთ.

„ძვირადღირებულ ონკოლოგიურ მედიკამენტებს რაც შეეხება, პირდაპირი რეკომენდაცია გვქონდა რეფერენტული ფასწარმოქმნისას, რომ ძვირადღირებულ მედიკამენტზე რეფერენტული ფასები არ დაწესდება, არ მომხდარა სხვა ქვეყნებშიც. შესაბამისი რეკომენდაციით მოგვმართეს ჩვენ კონსულტანტებმა, საკონსულტაციო ჯგუფმა, როგორც ჯანმრთელობის მსოფლიო ორგანიზაციის, ასევე მსოფლიო ბანკის დაქირავებულმა ექსპერტებმა. წავედით ძვირადღირებული მედიკამენტის პირდაპირი შესყიდვის გზით. გიდასტურებთ, რომ დაწყებული გვაქვს პირდაპირი შესყიდვის მოლაპარაკებები პირდაპირ მწარმოებლებთან. ერთ მხარეს იქნება მწარმოებელი კომპანია, მეორე მხარეს სამინისტრო და აქაც დამატებითი ფასდაკლების, შეღავათიანი ფასის პირობებში შევძლებთ იმას, რომ ონკოლოგიურ პაციენტებს სრული წლის საჭიროება დავუფინანსოთ“,-განაცხადა აზარაშვილმა.